Chechen bo‘linmalari Eron uchun jang qilmaydi — Ramzan Qodirov
Qodirov Eronning Fors ko‘rfazidagi mamlakatlarga hujumini qoralab, arab davlatlari bilan “birodarlik” munosabatida ekanini ta’kidladi.
Checheniston rahbari Ramzan Qodirov chechen harbiylari AQSh va Isroilga qarshi urushda Eron tomonida jang qilmasligini ma’lum qildi.
U bu haqda 8-aprel kuni Telegram kanalida rus va arab tillarida bayonot berib, ijtimoiy tarmoqlarda tarqalgan “chechen bo‘linmalari Eronga yuborilishi mumkin” degan xabarlarni rad etdi.
Qodirovning ta’kidlashicha, agar Eron faqat AQSh va Isroilga qarshi harakat qilganida, shunday bo‘lishi mumkin edi. Biroq u Eronning Fors ko‘rfazi arab davlatlaridagi nishonlarga zarba berayotganini tanqid qildi.
“Bu shunday bo‘lishi mumkin edi, agar Eron faqat AQSh va Isroilga qarshi harbiy harakat olib borayotganida. Ammo ular bizning birodarlarimizga ham hujum qilmoqda. Hech shubhasiz, shaxsan men Eron tomonini qo‘llab-quvvatlayman, ammo bitta ‘lekin’ bor — men Eronning Fors ko‘rfazi arab davlatlaridagi tinch obyektlar va fuqarolik infratuzilmasiga zarba berishini qo‘llab-quvvatlamayman”, — dedi Checheniston rahbari.
Checheniston rahbari BAA, Bahrayn va Saudiya Arabistoni yetakchilari bilan “birodarlik” munosabatida ekanini ham qayd etib, ushbu mamlakatlarda tinch aholi qurbon bo‘layotganidan norozi ekanini bildirdi.
Avvalroq Qodirov Eronning Yaqin Sharqdagi AQSh harbiy bazalariga zarbalarini “kutilgan javob” deb baholagan, biroq fuqarolik obyektlariga hujumlarni nomaqbul deb atagan edi.
Ma’lumot uchun, chechen bo‘linmalari Rossiyaning Ukrainaga qarshi urushida ishtirok etmoqda. Ukraina Xavfsizlik xizmati 2022 yilda Qodirov va uning yaqinlariga nisbatan harbiy jinoyatlar bo‘yicha dalillar borligini ma’lum qilgan.
