Ho‘rmuz bo‘g‘ozi qayta yopildi
Eron AQShni sulhni buzganlikda aybladi
Eron Isroilning Livanga uyushtirgan keng ko‘lamli hujumlaridan so‘ng, Ho‘rmuz bo‘g‘ozida kemalar harakatini chekladi. Bu haqda Fars agentligi xabar berdi.
Ma’lum qilinishicha, Eron harbiy-dengiz kuchlari Tehron ruxsatisiz o‘tishga uringan kemalar “yo‘q qilinishi” haqida ogohlantirgan.
AQSH va Eron 8-aprel kuni ikki haftalik sulhga erishgach Eron Ho‘rmuz bo‘g‘ozi orqali kemalar harakatiga to‘sqinlik qilmasligi, AQSH esa Tehronga zarbalarni to‘xtatishi kerak edi. Sulhdan so‘ng grek mulkdorlariga tegishli ikkita kema bo‘g‘ozdan o‘tishga ulgurgan.
Oq uy matbuot kotibi Kerolayn Levitt Ho‘rmuzning yopilishini “mutlaqo qabul qilib bo‘lmasligi”ni aytdi.
“Men Prezidentning Ho‘rmuz bo‘g‘ozi zudlik bilan, tez va xavfsiz tarzda qayta ochilishi kerakligi haqidagi talabini yana bir bor ta’kidlayman”, dedi u.
Tasnim agar Isroil Livandagi operatsiyalarini to‘xtatmasa, Eron AQSH bilan tuzilgan sulhdan chiqishga tayyorligini yozgan. Livanni o‘t ochishni to‘xtatish kelishuvi shartlariga kiritish bitimning majburiy qismi bo‘lgan. Biroq Isroil bosh vaziri Binyamin Netanyahu sulh Livanga taalluqli emasligini aytgan.
Eron parlamenti spikeri Muhammad Bag‘ir Qolibaf Tehron tomonidan o‘t ochishni to‘xtatishga asos qilib olingan 10 bandlik rejaning uchta asosiy bandi buzilganini aytdi. Uning so‘zlariga ko‘ra, AQSH va Isroil o‘z harakatlari bilan ikki tomonlama sulh tuzishni “mantiqsiz” qilib qo‘ygan.
Qolibaf aytgan 3 ta asosiy band quyidagilar:
Birinchisi — Livanda o‘t ochishni to‘xtatish bandiga rioya qilinmagani. Bunga Pokiston bosh vaziri Shahboz Sharif ham ishora qilib, sulh barcha frontlarga, jumladan, Livanga ham taalluqli ekanini aytgandi.
Ikkinchisi — Eron havo hududining buzilishi: Fors viloyatining Lar shahri osmonida Isroilga tegishli Hermes 900 droni urib tushirilgan.
Uchinchisi — Eronning uranni boyitish huquqi inkor etilishi. Bu huquq Eron taklifining oltinchi bandida mustahkamlangan.
Biroq Tramp tomonlar muzokaralar asosi sifatida AQSHning 15 bandlik rejasini olganini, unda uranni boyitishni to‘xtatish ko‘zda tutilganini da’vo qilgan.
Eron 10-aprel kuni Islomobodda bo‘lib o‘tadigan muzokaralarda ishtirok etmasligini ma’lum qildi. Manbalarga ko‘ra, delegatsiyaga Qolibafning o‘zi boshchilik qilishi kerak edi. AQSH tomonidan vitse-prezident Jey di Vens ishtirok etishi kutilmoqda.
SHuningdek, Jey Di Vens Vengriyaga tashrifi chog‘ida bergan intervyusida AQSh va Eron o‘rtasida tuzilgan sulh juda mo‘rt ekanini bildirgan edi.
