Markaziy bank Amir Temurning 690-yilligi munosabati bilan esdalik tangalarni sotuvga chiqardi
Tangalar 31,1 gramm og‘irlikda, kolleksion qiymatga ega va ikki xil dizaynda taqdim etilgan.
O‘zbekiston Markaziy banki Amir Temurning tavalludining 690-yilligi munosabati bilan esdalik tangalar va suvenir to‘plamlarini sotuvga chiqardi.
31,1 gramm og‘irlikdagi tangalar ikki xil dizaynda, 999,9 probali oltin va kumushdan tayyorlangan.
Shuningdek, shu og‘irlikdagi uchta tangadan iborat suvenir to‘plamlari ham xaridga taqdim etilgan. Tangalarda Sohibqiron Amir Temur tasviri va «Temur tuzuklari»dan iqtiboslar o‘yib yozilgan.
Markaziy bank ma’lumotlariga ko‘ra, 9-aprel holatiga:
Oltin tanga (31,1 g) – sotuv narxi 61 mln 426 ming so‘m, qayta sotib olish narxi 57 mln 331 ming so‘m;
Kumush tanga (31,1 g) – sotuv narxi 1 mln 875 ming so‘m, qayta sotib olish narxi 919 ming so‘m.
Qayd etilishicha, kun davomida narxlar xalqaro qimmatbaho metallar bozoriga qarab o‘zgarishi mumkin. Tangalarning narxi va mavjudligi haqidagi ma’lumotlar Markaziy bankning rasmiy manbalarida har kuni yangilanib boriladi.
