Navoiyda bolalarga zo‘ravonlik qilingan xususiy bog‘cha vaqtincha yopildi
Mazkur bog‘chadagi tarbiyachi bolalarga baqirgan, ularni siltab tortib, urgan va tepgan.
Navoiy shahridagi xususiy bog‘chada bolalarga qo‘pol muomala qilib, ularni urgan tarbiyachi ishdan olinib, muassasa vaqtincha yopildi. Bu haqda Bu haqda viloyat Maktabgacha va maktab ta’limi boshqarmasi xabar berdi.
Ijtimoiy tarmoqlarda tarqalgan videolarda tarbiyachi bolalarga baqirgani, siltab tortib, urgani va tepgani aks etgan.
Viloyat Maktabgacha va maktab ta’limi boshqarmasi xabariga ko‘ra, hodisa boshqarma huzurida tuzilgan ishchi guruh tomonidan atroflicha o‘rganildi.
Tekshiruv natijasida pedagogik etika va kasbiy me’yorlarga zid harakat qilgan tarbiyachi bilan tuzilgan mehnat shartnomasi amaldagi qonunchilik asosida bekor qilindi.
Shuningdek, ta’lim muassasasining faoliyati qonunda belgilangan tartibda vaqtincha to‘xtatildi.
Holat yuzasidan tegishli tartibda qo‘shimcha o‘rganish ishlari boshlandi.
