Netanyaxu Livan bilan tinchlik muzokaralarini boshlashni buyurdi
Muzokaralar Hizbullohni qurolsizlantirish va tinchlik o‘rnatishga qaratilgan.
Isroil Bosh vaziri Benyamin Netanyaxu Livan bilan to‘g‘ridan-to‘g‘ri tinchlik muzokaralarini imkon qadar tezroq boshlash bo‘yicha ko‘rsatma berdi. Bu haqda uning idorasi bayonotida ma’lum qilingan.
Qayd etilishicha, mazkur qaror Livan tomonidan bir necha bor ilgari surilgan muzokaralar o‘tkazish takliflariga javoban qabul qilingan.
“Livan tomonidan Isroil bilan to‘g‘ridan-to‘g‘ri muzokaralarni boshlash bo‘yicha takroriy chaqiriqlarni inobatga olib, men ularni imkon qadar tezroq boshlashni buyurdim”, — deyiladi bayonotda.
Isroil tomonining ta’kidlashicha, muzokaralarning asosiy maqsadi Hizbulloh guruhini qurolsizlantirish hamda Isroil va Livan o‘rtasida barqaror tinchlik munosabatlarini yo‘lga qo‘yishdan iborat.
Avvalroq, Livan prezidenti xalqaro vositachilar ishtirokida Isroil bilan to‘g‘ridan-to‘g‘ri muzokaralar o‘tkazish tashabbusi bilan chiqqan edi. U mintaqadagi vaziyatni diplomatik yo‘l bilan hal qilish zarurligini ta’kidlagan.
Hozirda tomonlar o‘rtasida ehtimoliy muzokaralarning formati va kun tartibini belgilash bo‘yicha tayyorgarlik ishlari olib borilishi kutilmoqda.
