Ombudsman mahkumlarni qiynoqqa solgan IIO xodimlariga jinoiy ish qo‘zg‘atilganini ma’lum qildi
13 nafar xodimga nisbatan intizomiy jazo qo‘llanilgan, 2 nafari xizmatdan bo‘shatilgan, 1 nafari esa ogohlantirilgan.
Feruza Eshmatova Senat majlisida 2025-yilda mahkumlarga nisbatan qiynoqlar qo‘llangani yuzasidan 4 nafar ichki ishlar organi xodimiga nisbatan jinoiy ish qo‘zg‘atilganini ma’lum qildi.
Oliy Majlisning Inson huquqlari bo‘yicha vakilning so‘zlariga ko‘ra, mahkumlarga ruhiy va jismoniy bosim o‘tkazilgani haqidagi murojaatlar o‘rganilib, 39 ta holat bo‘yicha ichki ishlar xodimlariga nisbatan xizmat tekshiruvlari tayinlangan.
Natijada 13 nafar xodimga nisbatan intizomiy jazo qo‘llanilgan, 2 nafari xizmatdan bo‘shatilgan, 1 nafari esa ogohlantirilgan.
Shuningdek, 12 ta murojaat bo‘yicha jinoiy ish qo‘zg‘atishni rad etish haqidagi qarorlar bekor qilinib, qo‘shimcha tekshiruvlar tayinlangan.
Ombudsman ma’lumotiga ko‘ra, 2025-yilda inson huquqlarini buzgan jami 118 nafar davlat va huquqni muhofaza qiluvchi organ xodimi intizomiy, ma’muriy va jinoiy javobgarlikka tortilgan.
Yil davomida qiynoqlarning oldini olish maqsadida 954 ta monitoring tashrifi amalga oshirilgan. Ushbu jarayonda 11 mingdan ortiq mahkum bilan jamoaviy, qariyb 5,5 ming nafari bilan esa individual suhbatlar o‘tkazilgan.
Bundan tashqari, sanitariya talablariga javob bermagani sabab Chinoz, Qibray va Yuqori Chirchiq tumanlaridagi vaqtincha saqlash hibsxonalarining faoliyati tugatilgan.
