O‘zbekiston Islom sivilizatsiyasi markazi TURKSOY tomonidan eng yaxshi muzey deb e’tirof etildi
Markazda Amir Temur tavalludining 690 yilligiga bag‘ishlangan xalqaro ilmiy konferensiyada 20 dan ortiq mamlakatdan 300 nafardan ziyod olimlar, ekspertlar va diplomatlar ishtirok etdi.
Toshkent shahrida joylashgan O‘zbekiston Islom sivilizatsiyasi markazida Amir Temur tavalludining 690 yilligi munosabati bilan “Amir Temur va Temuriylar tamaddunining jahon tarixi va madaniyatidagi o‘rni” mavzusida xalqaro ilmiy konferensiya bo‘lib o‘tdi. Mazkur anjuman O‘zbekiston Respublikasi Prezidenti Shavkat Mirziyoyev tashabbusi bilan tashkil etilgan bo‘lib, u qisqa vaqt ichida nufuzli xalqaro ilmiy muloqot maydoniga aylandi.
Mazkur konferensiyada 20 dan ortiq mamlakatdan 300 nafardan ziyod olimlar, ekspertlar, diplomatlar va jamoatchilik vakillari ishtirok etmoqda. Ular orasida ICESCO, Oxford Centre for Islamic Studies, IRCICA hamda “Al-Furqon” jamg‘armasi kabi xalqaro tashkilotlar va ilmiy markazlar vakillari ham bor. Anjuman O‘zbekiston Fanlar akademiyasi, Tashqi ishlar vazirligi va Islom sivilizatsiyasi markazi tomonidan tashkil etilgan bo‘lib, WOSCU hamkor sifatida ishtirok etmoqda.
Konferensiya doirasida Amir Temur shaxsi va Temuriylar davri merosining jahon sivilizatsiyasidagi o‘rni atroflicha muhokama qilindi. Xususan, davlat boshqaruvi va diplomatiya, harbiy strategiya, me’morchilik va shaharsozlik, ilm-fan va ta’lim rivoji kabi yo‘nalishlar bo‘yicha ilmiy ma’ruzalar taqdim etildi. Mutaxassislar ushbu davrni Sharq Uyg‘onishining muhim bosqichi sifatida baholab, uning global siyosat, iqtisodiyot va madaniyat taraqqiyotiga ko‘rsatgan ta’siriga alohida e’tibor qaratdi.
E’tiborli jihatlardan yana biri — TURKSOY tomonidan O‘zbekiston Islom sivilizatsiyasi markazi “eng yaxshi muzey” deb e’tirof etilganidir. Bu esa markazning nafaqat O‘zbekistonda, balki xalqaro miqyosda ham yuksak nufuzga ega ekanini tasdiqlaydi.
Ayni paytda, TURKSOY tomonidan mazkur markazning “eng yaxshi muzey” deb e’tirof etilgani uning xalqaro miqyosdagi nufuzi va ahamiyatini yanada oshirib, O‘zbekistonning boy tarixiy-madaniy merosini jahon hamjamiyatiga keng namoyon etishda muhim omil bo‘lib xizmat qilmoqda.
