O‘zbekistonda bir qator bozorlarning ayrim bloklari vaqtincha yopildi
Ushbu bozorlarda yong‘in xavfsizligi talablari buzilgani aniqlandi.
Toshkent, Samarqand, Urganch shaharlaridagi bozorlarda yong‘in xavfsizligi talablari buzilgani aniqlandi. Bu haqda FVV xabar berdi.
Ma’lum qilinishicha, 8-aprel kuni Toshkent shahar Favqulodda vaziyatlar bosh boshqarmasi xodimlari tomonidan poytaxtdagi bir nechta bozorlarda yong‘in xavfsizligi talablariga rioya etilishi yuzasidan reyd tekshiruvlari o‘tkazildi.
Tekshiruvlar davomida Yashnobod tumanidagi "Aviasozlar" dehqon bozori, Shayxontohur dehqon bozori hamda Chilonzor buyum bozorining ayrim hududlarida yong‘in xavfsizligi qoidalari qo‘pol ravishda buzilgani aniqlandi. Shu sababli, kamchiliklar bartaraf etilgunga qadar mazkur bozorlardagi ayrim bloklar faoliyati vaqtincha to‘xtatildi.
Shu bilan birga, Xorazm viloyati Favqulodda vaziyatlar boshqarmasi tomonidan Urganch buyum bozorida o‘tkazilgan tekshiruvlarda ham qator jiddiy qoidabuzarliklar aniqlandi. Mutasaddilarga ko‘ra, ushbu kamchiliklar o‘z vaqtida aniqlanmaganida yirik yong‘in va og‘ir oqibatlarga olib kelishi mumkin edi. Natijada, bozor faoliyati vaqtincha yopilgan.
Bundan tashqari, Samarqand viloyati Favqulodda vaziyatlar boshqarmasi tomonidan Samarqand shahridagi Qurilish materiallari savdo majmuasi ham yong‘in xavfsizligi talablariga rioya etilmagani sabab vaqtincha to'xtatilgan.
Avvalroq Toshkent shahridagi “Beshqo'rg'on” bozoridagi yirik yong‘in xavfsizlik qoidalariga rioya qilinmagani sabab yuzaga kelgani haqida ma’lum qilingandi.
