O‘zbekistonda bolalar saratoniga qarshi kurash uchun yangi tizim yo‘lga qo‘yildi

O‘zbekistonda bolalar o‘rtasida uchrayotgan onkologik va onkogematologik kasalliklarga qarshi kurashni kuchaytirish bo‘yicha keng ko‘lamli islohotlar amalga oshirilmoqda. Prezidentning 2025 yil 19 maydagi PQ-186-son qaroriga muvofiq, 2025–2030 yillarga mo‘ljallangan milliy strategiya doirasida kasalliklarni erta aniqlash, tashxis qo‘yish muddatlarini qisqartirish hamda davolash samaradorligini oshirish asosiy vazifalar etib belgilangan.

 

Mazkur hujjat bolalar onkologiyasi, gematologiyasi va immunologiyasi sohasini yangi bosqichga olib chiqish, ixtisoslashtirilgan tibbiy yordam qamrovini kengaytirish va zamonaviy diagnostika hamda davolash usullarini joriy etishga qaratilgan.

 

Hozirda Bolalar onkologiyasi, gematologiyasi va immunologiyasi ilmiy-amaliy tibbiyot markazida zamonaviy texnologiyalar asosida davolash yo‘lga qo‘yilgan. Markaz faoliyatiga xorijiy yuqori malakali mutaxassislar jalb etilib, xalqaro standartlar asosida tibbiy xizmat ko‘rsatish yo‘lga qo‘yilgan. Har bir bemor bolaga individual yondashuv ta’minlanmoqda.

 

Hozirda markaz dori vositalari bilan davlat byudjeti, Jahon sog‘liqni saqlash tashkiloti (JSST) hamda Sent-Jud kasalxonasi tomonidan amalga oshirilayotgan “Bolalar saratonini davolash uchun Global platforma” loyihasi orqali ta’minlanmoqda. Ushbu dorilar O‘zbekiston fuqaroligi bo‘lgan barcha bolalarga bepul berilmoqda.

 

Shuningdek, ilgari bemorlar markazga kelib olgan dori vositalarini endilikda viloyatlardagi filiallar orqali yetkazib berish tizimi joriy etildi. Maxsus transport orqali amalga oshirilayotgan bu jarayonda dori vositalarining sifati va saqlash sharoitlariga qat’iy rioya qilinmoqda.

 

Mutaxassislar fikricha, amalga oshirilayotgan ushbu chora-tadbirlar bolalar o‘rtasida yashovchanlik ko‘rsatkichlarini oshirish, kasalliklarni erta aniqlash va o‘lim holatlarini kamaytirishga xizmat qiladi.