Surxondaryoda qozonlar ichiga yashirilgan 190 kg dan ortiq giyohvand modda aniqlandi
750 dona afg'on qozonlarining 210 donasi ichiga yashirin tarzda narkotik joylashtirilgan.
Davlat xavfsizlik xizmatining Surxondaryo viloyati bo‘yicha boshqarmasi xodimlari tomonidan Chegara qo‘shinlari hamda O‘zbekiston Respublikasi Bojxona qo‘mitasi bilan hamkorlikda o‘tkazilgan tezkor-qidiruv tadbirlari natijasida yirik miqdordagi giyohvandlik vositalari kontrabandasi fosh etildi. Bu haqda DXX Zamon.uzga xabar berdi.
Ma’lum qilinishicha, Afg‘onistondan “Termiz” xalqaro avtomobil o‘tkazish punkti orqali kirib kelgan, Denov shahrida yashovchi 1990-yilda tug‘ilgan fuqaro boshqaruvidagi Hyundai yuk avtomashinasi nazorat tartibida chuqurlashtirilgan tekshiruvdan o‘tkazilgan.
Tekshiruv davomida avtomashina yukxonasida bo‘lgan jami 750 dona afg'on qozonlarining 210 donasi ichiga yashirin tarzda joylashtirilgan, umumiy og‘irligi taxminan 190 kilogramm 800 gramm bo‘lgan gashish moddasi aniqlanib, musodara qilingan.
Dastlabki ma’lumotlarga ko‘ra, ushbu afg'on qozonlari ishlab chiqaruvchi tomonidan Markaziy Osiyo davlatlaridan biridagi xo‘jalik yurituvchi subyekt nomiga jo‘natilgan bo‘lgan.
Hozirda mazkur holat yuzasidan tegishli tergov-surishtiruv ishlari olib borilmoqda.
