Yonilg‘i shoxobchalarida naqdsiz to‘lovlar ulushi ma’lum qilindi
Bir kunlik naqdsiz tushumlarning qariyb 90 foizi bank kartalari hissasiga to‘g‘ri kelmoqda. Shuningdek, QR-kod va Moment kartalar orqali ham to‘lov qilinmoqda.
2026-yil 1–2-aprel kunlari yoqilg‘i quyish shoxobchalarida naqdsiz hisob-kitoblar hajmi sezilarli darajada oshgani kuzatildi. Bu haqda Markaziy bank xabar berdi.
Rasmiy ma’lumotlarga ko‘ra, mart oyida kunlik o‘rtacha tushum 102,6 mlrd so‘mni tashkil etib, uning 58,1 foizi naqd, 41,9 foizi esa naqdsiz to‘lovlarga to‘g‘ri kelgan.
1-aprel kuni umumiy tushum 93,2 mlrd so‘mni tashkil etgan bo‘lsa, 2-aprelga kelib bu ko‘rsatkich keskin oshib, 152,6 mlrd so‘mga yetgan.
Qayd etilishicha, bir kunlik naqdsiz tushumlarning qariyb 90 foizi bank kartalari hissasiga to‘g‘ri kelmoqda. QR-kod orqali amalga oshirilayotgan to‘lovlar ham asosan bank kartalari orqali bajarilayotgani aholi orasida raqamli to‘lov vositalaridan faol foydalanilayotganini ko‘rsatadi.
Naqdsiz to‘lov usullari kesimida QR-kod orqali to‘lovlar 1-aprel kuni 8,2 mlrd so‘mni, 2-aprel kuni esa 7,7 mlrd so‘mni tashkil etdi. Moment kartalar orqali amalga oshirilgan to‘lovlar 1,6 mlrd so‘mdan 3,6 mlrd so‘mga oshib, keskin o‘sish qayd etildi. Yoqilg‘i kartalari orqali to‘lovlar mos ravishda 2,4 mlrd va 2,5 mlrd so‘mni tashkil etdi.
Shu bilan birga, mavjud bank kartalari orqali amalga oshirilgan to‘lovlar 1-aprel kuni 80,9 mlrd so‘m bo‘lgan bo‘lsa, 2-aprel kuni 138,6 mlrd so‘mga yetgan.
Mutasaddilar ta’kidlashicha, banklar va to‘lov tashkilotlari tomonidan joriy etilayotgan keshbek dasturlari, aksiyalar hamda yangi to‘lov vositalari — jumladan, moment va maxsus kartalar — naqdsiz to‘lovlar hajmining oshishiga xizmat qilmoqda.
Fuqarolarga to‘lovlar yoki bank xizmatlariga oid savollar yuzaga kelganda, tegishli banklar va to‘lov tashkilotlarining aloqa markazlariga murojaat qilish tavsiya etilgan.
