Yuqori Chirchiqda 5 milliard dollarlik tibbiyot shaharchasi quriladi
Loyiha 400 gektar maydonda qurilib, hudud xalqaro tibbiyot markaziga aylantiriladi.
Shavkat Mirziyoyev raisligida o‘tkazilgan yig‘ilishda Toshkent viloyatining Yuqori Chirchiq tumanida yirik investitsiya loyihasi — Tashkent Medical Smart City xalqaro innovatsion tibbiyot shaharchasini barpo etish masalasi muhokama qilindi.
O‘zbekiston Respublikasi Sog‘liqni saqlash vazirligi ma’lumotiga ko‘ra, qiymati 5 milliard dollar bo‘lgan loyiha 400 gektar maydonda amalga oshiriladi. U zamonaviy tibbiy infratuzilma yaratish, ilg‘or davolash xizmatlarini joriy etish va hududni xalqaro tibbiyot markaziga aylantirishni nazarda tutadi.
Yig‘ilishda, shuningdek, boshqa yirik ijtimoiy va innovatsion tashabbuslar ham ko‘rib chiqildi.
Xususan, Nurafshon shahrida 35,4 million dollarlik Kelajak texnologiyalari markazini tashkil etish, 100 dan ortiq xorijiy IT kompaniyalarni jalb qilish hamda xizmatlar eksporti hajmini yiliga 20 million dollarga yetkazish rejalari muhokama qilindi.
Bundan tashqari, 670 o‘rinli ko‘p tarmoqli tibbiyot klasteri, ijtimoiy muassasalar markazi va viloyat davlat arxivi binosini qurish loyihalari ham kun tartibidan o‘rin oldi.
Yig‘ilish davomida aholi murojaatlari bilan ishlash, jamoat xavfsizligini mustahkamlash, “yashil iqtisodiyot”ni rivojlantirish hamda yoshlarga oid siyosat yo‘nalishlaridagi ishlar tahlil qilindi.
Mas’ullarga hudud salohiyatidan samarali foydalanish, yangi ish o‘rinlari yaratish, aholi daromadlarini oshirish va loyihalarning aniq natijadorligini ta’minlash bo‘yicha topshiriqlar berildi.
Shuningdek, Toshkent viloyatini kambag‘allik va ishsizlikdan xoli hududga aylantirish ustuvor vazifa sifatida belgilandi. Yig‘ilishda ta’kidlanishicha, poytaxtga yaqin joylashgan viloyatda aholi turmush darajasToshkentnt darajasiga mos bo‘lishi lozim.
