AQSh birinchi xonimi Epshteyn bilan hech qanday aloqasi bo‘lmaganini aytdi

AQSH birinchi xonimi Melaniya Tramp Jeffri Epshteyn bilan bog‘liq da’volarni qat’iyan rad etib, jabrlanuvchilar uchun Kongress eshituvlarini o‘tkazishga chaqirdi. Bu haqda u kecha, 9-aprel kuni Oq uyda jurnalistlar bilan o‘tkazilgan matbuot anjumanida ma’lum qildi.

 

U Oq uyda qilgan chiqishida o‘zining jinsiy jinoyatchi Epshteyn bilan hech qanday aloqasi yo‘qligini ta’kidlab, bu boradagi iddaolarni “bugunoq to‘xtatilishi kerak bo‘lgan asossiz gaplar” deb atadi. Shuningdek, Melaniya Epshteyn uni Donald Tramp bilan tanishtirgani haqidagi mish-mishlarni ham “obro‘ga putur yetkazishga qaratilgan urinishlar” deya baholadi.

 

Birinchi xonimning aytishicha, u Epshteyn bilan faqat 2000-yilda qisqa muddat uchrashgan va uning jinoyatlari haqida hech qanday ma’lumotga ega bo‘lmagan.

 

 “Men hech qachon Epshteynning jabrlanuvchilarga nisbatan zo‘ravonligi haqida bilmaganman va hech qanday tarzda bu jarayonlarga aloqador bo‘lmaganman”, — dedi u.

 

U, shuningdek, Epshteynning yaqin hamkori Gizleyn Maksvellni tanimasligini bildirar ekan, 2002-yilga oid e’lon qilingan elektron yozishmalarni “oddiy, muloyim muloqot” sifatida izohladi.

 

Melaniya Tramp o‘z chiqishida qonun chiqaruvchilarni  jabrlanuvchilarga Kongressda qasamyod ostida ochiq guvohlik berish imkonini yaratishga chaqirdi: “Har bir ayol, agar xohlasa, o‘z hikoyasini ochiq aytishi va bu guvohliklar rasmiy qayd etilishi kerak. Shundagina haqiqat to‘liq ochiladi”, — dedi u.

 

Mazkur bayonot AQSHda turlicha munosabat uyg‘otdi. Ayrim jabrlanuvchilar buni ijobiy qadam sifatida baholagan bo‘lsa, boshqalar ochiq eshituvlar o‘rniga yopiq formatdagi tinglovlar ma’qulroq bo‘lishi mumkinligini ta’kidladi. Ularning fikricha, ko‘plab jabrlanuvchilar maxfiylik kelishuvlari yoki xavfsizlik sababli ochiq gapirishdan cho‘chishi mumkin.

 

AQSH Kongressi Vakillar palatasi nazorat qo‘mitasining yetakchi demokrat a’zosi Robert Garsia birinchi xonim tashabbusini qo‘llab-quvvatlab, qo‘mita raisi James Komerni tez fursatda eshituvlar tashkil etishga chaqirdi.

 

Shu bilan birga, prezident Donald Trump mazkur bayonot haqida oldindan to‘liq xabardor bo‘lmaganini bildirgan. U Epshteynni bir vaqtlar taniganini tan olgan, biroq keyinchalik uni Palm Bichdagi Mar-a-Lago klubidan “nomaqbul shaxs” sifatida chetlashtirganini aytgan. Avvalroq, New York Magazine Tramp Epshteynni “ajoyib yigit” deb atab, “u bilan vaqt o‘tkazish juda maroqli”ligini aytganini yozgandi.

 

Kuzatuvchilarga ko‘ra, birinchi xonimning ushbu chiqishi Epshteyn ishi, unga aloqador shaxslar va tergov hujjatlarining oshkor etilishi masalasiga jamoatchilik e’tiborini yana kuchaytirishi mumkin.