Prezident Shavkat Mirziyoyev Buxorodagi aeroport loyihasi bilan tanishdi
Yangi aeroport va unga tutash infratuzilma uchun shahar tashqarisidan 370 gektar yer maydoni ajratilgan.
Prezident Shavkat Mirziyoyev Buxoro viloyatiga tashrifi doirasida hududda amalga oshirilayotgan yirik bunyodkorlik loyihalari, xususan, yangi xalqaro aeroport qurilishi bilan tanishdi.
Mamlakatimizda transport infratuzilmasini modernizatsiya qilish va kengaytirish ishlari izchil davom etmoqda. Yangi avtomobil yo‘llari, ko‘priklar barpo etilib, yo‘lovchilar uchun qulayliklar oshirilmoqda. Shu jarayonda Buxoro viloyatining turizm salohiyatini yanada yuksaltirish maqsadida yangi xalqaro aeroport qurilishi muhim ahamiyat kasb etadi.
Mazkur loyiha davlat rahbarining 2024-yildagi tashrifi chog‘ida berilgan topshiriqlar asosida amalga oshirilmoqda. Yangi aeroport va unga tutash infratuzilma uchun shahar tashqarisidan 370 gektar yer maydoni ajratilgan.
Loyiha doirasida aeroportga olib boruvchi zamonaviy avtomobil yo‘li qurilmoqda. Uning umumiy uzunligi 23,8 kilometrni tashkil etadi. Shundan 2,7 kilometri yangi yo‘l sifatida barpo etilsa, 21,1 kilometri rekonstruksiya qilinadi.
Shuningdek, yo‘l bo‘yida 2 ta yo‘l o‘tkazgich, 9 ta yerosti piyodalar o‘tish joyi va 8 ta ko‘prik qurilishi rejalashtirilgan.
Yangi aeroportda uzunligi 3,3 kilometr bo‘lgan uchish-qo‘nish yo‘lagi barpo etilib, u barcha turdagi havo kemalarini qabul qilish imkonini beradi. Shuningdek, soatiga 1200 nafargacha yo‘lovchiga xizmat ko‘rsatish quvvatiga ega zamonaviy aerovokzal majmuasi quriladi.
Davlat rahbari loyiha jahon standartlariga to‘liq mos bo‘lishi zarurligini ta’kidladi. Ushbu aeroport Buxoro viloyati aholisi, shuningdek, mahalliy va xorijiy sayyohlar uchun yuqori darajada qulay xizmat ko‘rsatishga xizmat qiladi.
Taqdimot davomida hududning iqtisodiy, investitsiyaviy va turizm salohiyatini oshirishga qaratilgan boshqa istiqbolli loyihalar haqida ham axborot berildi.
