Putin yoki Tramp tufayli energiya narxining doimiy ravishda oshishidan to‘ydim — Kir Starmer
Yaqin Sharqdagi urush sabab Buyuk Britaniya hukumati energiya to‘lovlarini nazorat qilishga majbur bo‘lmoqda.
Buyuk Britaniya bosh vaziri Kir Starmer energiya narxlarining tez-tez o‘zgarishi ortida global siyosiy omillar turganini ta’kidlab, vaziyatdan noroziligini bildirdi.
U 9-aprel kuni ITV News telekanaliga bergan intervyusida mamlakat bo‘ylab aholining hamda biznes vakillarining energiya uchun to‘lovlari doimiy ravishda o‘zgarib borayotganini keskin tanqid qildi.
“Men butun mamlakat bo‘ylab oilalar va korxonalarning energiya hisoblari doimiy ravishda o‘zgarib turayotganini ko‘rib, bundan to‘yib ketdim. Bu holat dunyoning turli nuqtalarida Vladimir Putin yoki Donald Tramp tomonidan qabul qilinayotgan qarorlar bilan bog‘liq”, — dedi Starmer.
Intervyudan ko‘p o‘tmay, The Guardian nashrida chop etilgan maqolada bosh vazir hukumat energiya narxlarining keskin oshib ketishini jilovlash choralarini ko‘rayotganini qayd etdi. Uning so‘zlariga ko‘ra, Yaqin Sharqdagi mojaro fonida elektr energiyasi narxlarini cheklash va milliy energetika tizimiga investitsiyalarni oshirish orqali tashqi omillarga qaramlikni kamaytirish maqsad qilingan.
Ma’lumot uchun, Rossiyaning 2022-yil fevral oyida Ukrainaga bostirib kirishi ortidan energiya resurslari narxlari keskin oshgan edi. Shuningdek, 28-fevral kuni boshlangan AQSh va Isroilning Eron bilan bog‘liq harbiy harakatlari ham global energiya bozoriga bosim o‘tkazdi.
Biroq 8-aprelga o‘tar kechasi AQSh va Eron o‘rtasida ikki haftalik o‘t ochishni to‘xtatish bo‘yicha kelishuvga erishilgach, xomashyo narxlarida keskin pasayish kuzatildi.
