Toshkent viloyatida 1 mlrd so‘mlik sifatsiz dorilar savdosi to‘xtatildi
Fuqaro yashash xonadonida noqonuniy dori ombori tashkil qilgani aniqlandi.
Toshkent viloyatida noqonuniy dori vositalari saqlangan yashirin ombor aniqlandi. Bu haqda DXX xabar berdi.
Ma’lum qilinishicha, DXX va Bojxona idoralari hamkorligida o‘tkazilgan tezkor tadbirda Toshkent viloyatining Toshkent tumanida istiqomat qiluvchi, 1991 y.t. shaxs o‘z yashash xonadonida xorijdan aylanma yo‘llar orqali olib kelingan dori vositalarini saqlab, poytaxtdagi dorixonalarga sotish bilan shug‘ullanib kelganligi aniqlangan.
Omborda jami 119 turdagi, 3356 qutida bo‘lgan 76318 dona “Frotu”, “Budenofalk”, “Gaviscon”, “Baraclude” va boshqa nomdagi dori vositalari aniqlanib, protsessual tartibda rasmiylashtirib olingan. Ularning dastlabki umumiy qiymati taxminan 1 mlrd so‘mni tashkil etadi.
Hozirda dori vositalaridan namunalar olinib, ekspertiza o‘tkazish uchun Farmatsevtika mahsulotlari xavfsizligi markaziga yuborildi.
Holat yuzasidan tergovga qadar tekshiruv harakatlari davom etmoqda.
