2026–2027 o‘quv yili uchun 1-sinfga qabul tartibi tasdiqlandi

O‘zbekiston Maktabgacha va maktab ta’limi vazirining tegishli buyrug‘i bilan 2026–2027 o‘quv yilida umumiy o‘rta ta’lim maktablarining 1-sinfiga qabul jarayonlarini tashkil etish tartibi tasdiqlandi.

 

Hujjatga muvofiq, 1-sinfga qabul qilish bo‘yicha davlat xizmati joriy etiladigan tuman (shahar)lar soni 64 tadan 135 taga, umumiy o‘rta ta’lim maktablari soni esa 1956 tadan 5689 taga yetkazilgan.

 

Qayd etilishicha, 2026–2027 o‘quv yilida davlat umumiy o‘rta ta’lim maktablarining 1-sinfiga qabul jarayonlari Yagona interaktiv davlat xizmatlari portali (my.gov.uz) hamda Maktabgacha va maktab ta’limi vazirligining elektron portali (my.maktab.uz) orqali amalga oshiriladi.

 

Qabul jarayoni 2026-yil 20-iyundan 31-iyulgacha mikrohudud doirasida, 1–31-avgust kunlari esa mikrohududdan tashqari hududlardan amalga oshirilishi belgilangan.

 

Amaldagi tartibga ko‘ra, 1-sinfga bolalar ular 7 yoshga to‘ladigan yilda qabul qilinadi. Shunga muvofiq, 2026–2027 o‘quv yilida 2019-yil 31-dekabrgacha tug‘ilgan bolalar maktabga qabul qilinadi.

 

Shuningdek, davlat xizmati joriy etilmagan hududlarda qabul jarayonlari an’anaviy tartibda maktab rahbarlari tomonidan amalga oshiriladi. Qabul qilingan o‘quvchilar haqidagi ma’lumotlar vazirlikning adm.maktab.uz elektron tizimiga kiritib boriladi.

 

Vazirlik ma’lumotiga ko‘ra, qabul jarayonlariga doir barcha ma’lumotlar — jumladan qabul rejasi, muddatlar, mikrohududlar hamda boshqa til sinflari bo‘yicha talablar — maktab binolarining ko‘rinarli joylariga joylashtiriladi.

 

Qabul muddati yakunlangach, mikrohudud va undan tashqari hududlar bo‘yicha qo‘shimcha qabulga yo‘l qo‘yilmasligi qat’iy belgilangan.

 

Shuningdek, 2026-yil 10-avgustga qadar 1-sinfga qabul qilingan bolalar bo‘yicha ma’lumotlar asosida 12 turdagi o‘quv qurollaridan iborat Prezident sovg‘alarini yetkazib berish rejalashtirilgan. Ushbu jihozlar 20-avgustgacha maktablarga tarqatilishi belgilangan.