Turkiyada Netanyahuga 4596 yilgacha qamoq jazosi berilishi so‘ralmoqda
Isroilning yuqori martabali amaldorlari genotsid, erkinlikdan mahrum qilish va boshqa qator og‘ir jinoyatlarda ayblanmoqda.
Istanbulda “Sumud floti” kemalariga nisbatan xalqaro suvlarda amalga oshirilgan qurolli aralashuv yuzasidan tergov yakunlanib, 35 nafar gumonlanuvchiga nisbatan ayblov xulosasi sudga taqdim etildi. Ular orasida Isroil bosh vaziri Binyamin Netanyahu ham bor. Bu haqda "Hürriyet" gazetasi xabar berdi.
Bosh prokuraturaning Terror jinoyatlarini tergov qilish bo‘limi olib borgan surishtiruvga ko‘ra, G‘azoga insonparvarlik yordamini yetkazish maqsadida tuzilgan “Sumud floti” kemalariga Isroil xavfsizlik kuchlari tomonidan xalqaro suvlarda hujum qilingan.
Tergov materiallarida qayd etilishicha, hujumni rejalashtirish va amalga oshirishda ishtirok etgani aniqlangan, jumladan ichida Isroil hukumatidagi amaldorlar ham bo‘lgan 35 nafar shaxsga nisbatan hibsga olish qarori chiqarilgan va ayblov xulosasi rasmiylashtirilgan.
Prokuratura bayonotida tinch aholiga qarshi hujumlar, insonparvarlik yordamining to‘sib qo‘yilishi hamda aholini og‘ir sharoitlarga qo‘yish kabi harakatlar oddiy xavfsizlik chorasi sifatida baholanmasligi, balki xalqaro huquq nuqtayi nazaridan “genotsid” va “insoniyatga qarshi jinoyatlar” bilan bevosita bog‘liqligi ta’kidlangan.
Shuningdek, Turkiya fuqarolariga nisbatan sodir etilgan harakatlar mamlakat Konstitutsiyasi va xalqaro inson huquqlari majburiyatlari doirasida ko‘rib chiqilishi zarurligi qayd etilgan. Hujjatda davlatning bunday holatlarda samarali tergov o‘tkazish va sud mexanizmlarini ishga tushirish majburiyati borligiga e’tibor qaratilgan.
Ayblov xulosasida Isroil harbiy-dengiz kuchlari tomonidan amalga oshirilgan amaliyot xalqaro suvlarda sodir etilgani alohida qayd etilgan. Shu asosda BMTning dengiz huquqi normalari hamda Turkiya jinoyat qonunchiligi talablari asosida ish bo‘yicha tergov boshlangan.
Ayblanuvchilar orasida Binyamin Netanyahudan tashqari, Isroil mudofaa vaziri Israel Katz, sobiq mudofaa vaziri Yoav Gallant, shuningdek boshqa yuqori martabali amaldorlar ham bor.
Prokuratura gumonlanuvchilarni “insoniyatga qarshi jinoyatlar”, “genotsid”, “erkinlikdan mahrum qilish”, “qiynoqlar” va boshqa qator og‘ir jinoyatlarda ayblab, har biriga nisbatan alohida og‘irlashtirilgan umrbod qamoq jazosi hamda 1102 yil 9 oydan 4596 yilgacha ozodlikdan mahrum etish jazosini tayinlashni so‘ramoqda.
