Avstraliyada ilk bor ayol kishi armiya qo‘mondoni bo‘ladi

Avstraliya hukumati mamlakat mudofaa tizimi rahbariyatidagi o‘zgarishlar doirasida ilk bor ayol kishini armiya qo‘mondoni lavozimiga tayinlanishini ma’lum qildi, deya xabar bermoqda Reuters.

 

Hukumat bayonotiga ko‘ra, hozirda Qo‘shma kuchlar rahbari bo‘lib ishlayotgan general-leytenant Syuzan Koyl joriy yil iyul oyidan boshlab armiya qo‘mondoni sifatida faoliyatini boshlaydi. Koyl bu lavozimda general-leytenant Saymon Styuart o‘rnini egallaydi.

 

Bosh vazir Antoni Albanezining ta’kidlashicha, mazkur tayinlov Avstraliya armiyasining 125-yillik tarixidagi ilk holat bo‘ladi. Mudofaa vaziri Richard Marles esa bu qarorni “juda muhim tarixiy lahza” sifatida baholamoqda.

 

Koylning tayinlanishi mamlakat qurolli kuchlarida ayollar ulushini oshirishga qaratilgan siyosat fonida amalga oshirilmoqda. Ayni paytda, armiya jinsiy ta’qib va kamsitish bilan bog‘liq tizimli muammolar haqidagi ayblovlar bilan ham yuzma-yuz kelmoqda.

 

Ma’lum qilinishicha, 55 yoshli Koyl 1987-yilda harbiy xizmatni boshlagan bo‘lib, qator yuqori lavozimlarda ishlagan. U qurolli kuchlarga to‘liq rahbarlik qilgan ilk ayolga aylanadi.

 

Hozirda Avstraliya Mudofaa armiyasi tarkibida ayollar taxminan 21 foizni, yuqori rahbariyat lavozimlarida esa 18,5 foizni tashkil etadi. Qurolli kuchlar 2030-yilga qadar bu ko‘rsatkichni 25 foizga yetkazishni rejalashtirgan.

 

Ma’lumot uchun, o‘tgan yilning oktyabr oyida Mudofaa armiyasiga qarshi minglab ayol zobitlarni muntazam jinsiy tajovuz, ta’qib va ​​kamsitishdan himoya qila olmagani uchun jamoaviy da’vo qo‘zg‘atilgan edi.