Qirg‘iziston sobiq prezidenti Qurmanbek Bakiyevning ukasi O‘zbekistonda vafot etgani aytilmoqda
Ahmat Bakiyev 66 yoshda bo‘lgan va vafoti sabablari rasman ochiqlanmagan.
Qurmanbek Bakiyevning ukasi Ahmat Bakiyev O‘zbekiston hududida vafot etdi. Bu haqda Sputnik Qirg‘iziston manbalarga tayanib xabar berdi.
Ma’lumotlarga ko‘ra, marhumning jasadi Jalolobod viloyatiga olib borilishi rejalashtirilgan bo‘lib, u ajdodlari yashagan Masadan (Teyit) qishlog‘ida dafn etiladi.
Dastlabki ma’lumotlarga ko‘ra, Ahmat Bakiyev 66 yoshda bo‘lgan. Uning vafoti sabablari rasman ochiqlanmagan.
Eslatib o‘tamiz, u avvalroq Qirg‘izistonda bir qator og‘ir jinoyatlar, jumladan, ommaviy tartibsizliklarni tashkil etish, etnik adovatni qo‘zg‘atish, tovlamachilik va firibgarlik ayblovlari bilan sudlangan edi. 2011-yilda unga nisbatan 7 yil muddatga ozodlikdan mahrum qilish jazosi tayinlangan.
Shuningdek, 2012-yilda uning davolanish uchun yotqizilgan shifoxonadan qochib ketgani haqida xabarlar tarqalgan edi.
Ma’lumot uchun, Qurmanbek Bakiyevning o‘zi ham mamlakatda sodir bo‘lgan voqealar yuzasidan sirtdan sudlanib, uzoq muddatli qamoq jazosiga hukm qilingan va hozirda xorijda istiqomat qilmoqda.
