Toshkent shahar hokimligi 2025-yilning eng yopiq davlat tashkiloti bo‘ldi
Korrupsiyaga qarshi kurashish agentligining Ochiqlik indeksida 66 ta davlat organi “yashil”, 22 tasi “sariq” va 9 tasi “qizil” toifada qayd etild
Ochiqlik indeksida Toshkent shahar hokimligi 2025-yilda eng yopiq davlat organi sifatida qayd etildi. Bu haqda Korrupsiyaga qarshi kurashish agentligi xabar berdi.
Ma’lum qilinishicha, 2025-yil yakunlari bo‘yicha o‘tkazilgan navbatdagi baholashda jami 97 ta vazirlik, idora, muassasa va mahalliy davlat hokimiyati organlari qamrab olindi. Baholash jarayoni 84 ta mezonni o‘z ichiga olgan 8 ta indikator asosida amalga oshirildi. Baholash yakunida 66 ta davlat organi “yashil”, 22 tasi “sariq” va 9 tasi “qizil” toifadan o'rin oldi.
Taqqoslashlarga ko‘ra, 2022-yildagi ilk baholash natijalariga nisbatan “yashil” toifadagi tashkilotlar soni 3,5 baravarga oshgan. Shu bilan birga, “sariq” toifadagilar 2 baravarga, “qizil” toifadagilar esa 3 baravarga kamaygan.
Ochiqlik bo‘yicha eng yuqori ko‘rsatkichlar Navoiy kon-metallurgiya kombinati, O‘zbekgidroenergo, O‘zavtosanoat aksiyadorlik jamiyatlari, Transport nazorati inspeksiyasi, Olmaliq kon-metallurgiya kombinati, shuningdek, Raqamli texnologiyalar vazirligi va Adliya vazirligi tomonidan qayd etildi.
Eng past ko‘rsatkichlar esa respublika darajasida O‘rmon va yashil hududlarni ko‘paytirish, cho‘llanishga qarshi kurashish agentligi hamda O‘zbekiston temir yo‘llari aksiyadorlik jamiyatida, hududiy miqyosda esa Andijon viloyati va Toshkent shahar hokimliklarida kuzatilib, ular “qizil” toifaga kiritildi.
Shuningdek, 2026-yilning ikkinchi yarmidan boshlab sinov tariqasida Navoiy viloyati tuman va shahar hokimliklari hamda tashkilotlarining ochiqlik darajasini index.anticorruption.uz platformasi orqali baholash ko‘zda tutilmoqda.
