O‘zbekiston fuqarolariag Germaniyadagi harbiy muzeyga kirish ta'qiqlandi
Shuningdek, Rossiya, Ukraina, Qozogʻiston, Ozarbayjon, Xitoy, Shimoliy Koreya va boshqa bir qator davlatlarga ham cheklov joriy etilgan.
Germaniyaning Koblenz shahrida joylashgan Yevropaning eng yirik harbiy-texnik muzeylaridan biri bir qator davlatlar fuqarolari uchun tashrif buyurish tartibiga cheklovlar joriy etdi. Mazkur ro‘yxatga Oʻzbekiston ham kiritilgan.
Qayd etilishicha, qaror milliy xavfsizlik talablari hamda SÜG — ya’ni Germaniyaning xavfsizlikni tekshirish to‘g‘risidagi qonuni asosida qabul qilingan.
Yangi tartibga ko‘ra, xavfsizlik nuqtayi nazaridan “maxsus xavf guruhi”ga kiritilgan mamlakatlar fuqarolarining muzey hududiga kirishi vaqtincha cheklangan. Ushbu ro‘yxatdan Rossiya, Ukraina, Qozogʻiston, Armaniston, Ozarbayjon, Gruziya, Moldova, Xitoy, Shimoliy Koreya va boshqa bir qator davlatlar ham o‘rin olgan.
Mazkur muzey o‘zining noyob harbiy texnika va qurol-aslaha kolleksiyasi bilan mashhur bo‘lib, unda Birinchi jahon urushi davriga oid tanklar, zamonaviy Leopard 1 modellari hamda NATOga tegishli transport vositalarining noyob prototiplari namoyish etiladi. Muzey 1982-yildan buyon tashrif buyuruvchilar uchun ochiq bo‘lib kelmoqda.
Rasmiylarga ko‘ra, mazkur cheklovlar xavfsizlik choralarini kuchaytirish maqsadida joriy etilgan bo‘lib, ularning amal qilish muddati va tartibi vaziyatga qarab qayta ko‘rib chiqilishi mumkin.
