O‘zbekistonda dala chetlariga ekin ekmaganlar jarimaga tortiladi

O‘zbekistonda qishloq xo‘jaligi yerlaridan samarali foydalanishni ta’minlashga qaratilgan yangi tartib joriy etilmoqda. Unga ko‘ra, 2026-yil 14-iyuldan boshlab dala chetlariga ekin ekmagan shaxslar ma’muriy javobgarlikka tortiladi.

 

Qonun bilan bir qator normativ-huquqiy hujjatlarga o‘zgartirish va qo‘shimchalar kiritilgan. Xususan, Ma’muriy javobgarlik to‘g‘risidagi kodeksga kiritilgan normalarga muvofiq, ikkilamchi ijaraga olgan shaxslar tomonidan qishloq xo‘jaligi yerlarining dala chetlarida — kanal, sug‘orish hamda kollektor-drenaj tarmoqlari atrofida belgilangan maydon va muddatlarda maqbul ekin ekilmagani uchun jarima qo‘llanadi.

 

Jarima miqdori bazaviy hisoblash miqdorining (BHM) 1 baravaridan 3 baravarigacha, ya’ni 412 ming so‘mdan 1 million 236 ming so‘mgacha etib belgilangan.

 

Shuningdek, Soliq kodeksiga kiritilgan qo‘shimchalarga asosan, O‘simliklar karantini va himoyasi agentligi har yili 1-mayga qadar mazkur maydonlarda ekin ekilmagan yerlar hamda ularning egalari to‘g‘risidagi ma’lumotlarni davlat soliq organlariga elektron shaklda taqdim etishi shart. Ushbu ma’lumotlar asosida ekin ekilmagan yer uchastkalarining tegishli qismi uchun yer solig‘i stavkasi uch baravar oshirilgan holda hisoblanadi.

 

Mazkur qonun 2025-yil 15-iyulda Qonunchilik palatasi tomonidan qabul qilingan va 31-oktyabrda Senat tomonidan ma’qullangan. Hujjat qishloq xo‘jaligi yerlaridan samarali foydalanish, aholini asosiy oziq-ovqat mahsulotlari bilan ta’minlash hamda eksport salohiyatini oshirishga xizmat qilishi qayd etilgan.

 

Avvalroq 2025-yil fevral oyida kuchga kirgan tartibga muvofiq, tomorqa yerlarini qarovsiz qoldirgan xonadon egalari uchun ham uch baravar oshirilgan soliq stavkasi joriy etilgan edi.