Farrux Zokirov “Buyuk xizmatlari uchun” ordeni bilan mukofotlandi
“Yalla” ansambli rahbari O‘zbekiston madaniyatini rivojlantirishdagi xizmatlari hamda tavalludining 80 yilligi munosabati bilan taqdirlandi.
Farrux Zokirov zamonaviy o‘zbek qo‘shiqchilik san’atini rivojlantirish, milliy estrada ijrochiligini yangi bosqichga olib chiqish, madaniy merosni asrab-avaylash hamda uni xalqaro miqyosda targ‘ib etishdagi ulkan xizmatlari uchun davlat mukofoti bilan taqdirlandi.
Shavkat Mirziyoyev tomonidan imzolangan farmonga muvofiq, Farrux Zokirov “Buyuk xizmatlari uchun” ordeni bilan mukofotlandi.
Mukofotlash qarorida ta’kidlanishicha, san’atkorning o‘ziga xos iste’dodi va samarali ijodiy faoliyati milliy estrada san’atini rivojlantirishga, madaniyatimiz nufuzini oshirishga hamda yosh iste’dodlarni qo‘llab-quvvatlashga xizmat qilgan.
Shuningdek, u “Yalla” ansambliga asos solib, uni xalqaro miqyosda tan olingan ijodiy jamoaga aylantirgani, yosh ijodkorlarni tarbiyalash va ularning qobiliyatini ro‘yobga chiqarishdagi hissasi bilan alohida e’tirof etildi.
Qayd etilishicha, mazkur mukofot san’atkorning tavalludining 80 yilligi munosabati bilan ham topshirildi.
