Prezident Shavkat Mirziyoyev Butunjahon taekvondo federatsiyasi prezidentini “Do‘stlik” ordeni bilan taqdirladi
Shuningdek, O'zbekiston Prezidentiga mamlakatda taekvondoni rivojlantirishga qo‘shgan hissasi uchun Butunjahon taekvondo federatsiyasining oliy mukofoti — “Shon-sharaf ordeni” topshirildi.
Shavkat Mirziyoyev 15-aprel kuni yoshlar o‘rtasidagi jahon chempionati doirasida O'zbekistonda bo‘lib turgan Butunjahon taekvondo federatsiyasi prezidenti Cho Chung Wonni qabul qildi.
Uchrashuvda so‘nggi yillarda taekvondo yo‘nalishida O‘zbekistonda sezilarli o‘sish kuzatilgani qayd etildi. Mamlakatda ushbu sport turi bilan shug‘ullanuvchilar soni deyarli ikki barobarga oshib, 35 ming nafarga yetgani ta’kidlandi. Shuningdek, o‘zbekistonlik sportchilar Parijda bo‘lib o‘tgan Olimpiya va Paralimpiya o‘yinlarida umumjamoa hisobida uchinchi o‘rinni egallagani alohida qayd etildi.
Cho Chung Won O‘zbekistonda sportni rivojlantirish, yoshlar orasida sog‘lom turmush tarzini keng targ‘ib etish va zamonaviy infratuzilma yaratish bo‘yicha amalga oshirilayotgan islohotlarni yuqori baholadi.
Tomonlar hamkorlikni yanada kengaytirish, jumladan professional sportchilar va hakamlar tayyorlash, sun’iy intellekt va sport tibbiyoti sohasida tajriba almashish, shuningdek, xalqaro musobaqalarni O‘zbekistonda muntazam o‘tkazish masalalarini muhokama qildilar.
Uchrashuv yakunida Shavkat Mirziyoyevga mamlakatda taekvondoni rivojlantirishga qo‘shgan hissasi uchun Butunjahon taekvondo federatsiyasining oliy mukofoti — “Shon-sharaf ordeni” topshirildi.
Shuningdek, Cho Chung Won davlat rahbariga Do‘stlik ordeni bilan taqdirlandi.
Qayd etilishicha, ushbu mukofot ilk bor aynan davlat rahbariga topshirilgan bo‘lib, bu O‘zbekistonda taekvondo va sportni rivojlantirish borasidagi islohotlarning xalqaro miqyosda e’tirof etilganini ko‘rsatadi.
