Sadir Japarov “layk” sababli qamalgan fuqaroni ozod qilishga ko‘rsatma berdi
Qirg‘iziston Prezidenti Bosh prokurorga holatni o'rganishni topshirdi.
Qirg‘izistonda ijtimoiy tarmoqda “layk” bosgani uchun qamalgan fuqaro bilan bog‘liq holat davlat rahbari e’tiboriga tushdi. Bu haqda mahalliy manbalar xabar bermoqda.
Ma’lum qilinishicha, fuqaroning buvisi Prezidentga murojaat yo‘llab, nabirasi Abdullo Ismoilov ijtimoiy tarmoqlarda “layk” bosgani sababli 1 yil 7 oyga ozodlikdan mahrum etilganini bildirgan. Uning so‘zlariga ko‘ra, yigit Bishkek shahriga olib ketilgan.
Qirg‘iziston Prezidenti mazkur holatga munosabat bildirib, fuqaroni faqatgina “layk” bosgani uchun jazolashni noto‘g‘ri deb baholagan.
“Prokuror, bu sizning ishingiz, bu sizning nazoratingizda. Layk uchun qo‘lga olishingiz noto‘g‘ri, bu masalani ko‘rib chiqing. Tekshiruv o‘tkazing. Agar onaxonning gapi tasdiqlansa, yigitni darhol ozod qiling. Tushunarlimi? Ikkingiz ham hozir ishlang, onaxondan ma’lumotlarni oling. Agar bu haqiqat bo‘lsa (ozod qiling), bordi-yu boshqa sabab bo‘lsa, u holda iloj yo‘q”, — dedi Sadir Japarov.
Davlat rahbari Bosh prokurorga ushbu ishni har tomonlama va sinchiklab o‘rganish bo‘yicha topshiriq berdi.
