Tailandda eng katta “suv jangi”da 191 kishi halok bo‘ldi
Tailandda Songkran festivali vaqtida yo‘l-transport hodisalari keskin oshib, 951 ta YTH qayd etildi.
Tailandda har yili nishonlanadigan Songkran festivali davomida yo‘l harakati xavfsizligi bilan bog‘liq vaziyat keskin yomonlashib, so‘nggi uch kun ichida 191 kishi halok bo‘ldi. Bu haqda The New York Post xabar berdi.
Rasmiy ma’lumotlarga ko‘ra, ushbu davr mobaynida 951 ta yo‘l-transport hodisasi qayd etilgan bo‘lib, 911 kishi turli darajada tan jarohatlari olgan. Eng og‘ir ko‘rsatkichlardan biri sifatida bayramning birinchi kunidayoq 51 kishining hayotdan ko‘z yumgani qayd etildi.
Mutaxassislar ta’kidlashicha, halokatlarning asosiy sabablari tezlikni oshirish (taxminan 42 foiz) va mast holda transport vositasini boshqarish (27,4 foiz) bilan bog‘liq. Shuningdek, mototsikl haydovchilari tomonidan himoya shlemlaridan foydalanmaslik ham jarohatlar va o‘lim holatlarining ko‘payishiga sabab bo‘lgan.
Ma’lumotlarga ko‘ra, yo‘l-transport hodisalari eng ko‘p 15:01 dan 18:00 gacha bo‘lgan vaqt oralig‘ida sodir bo‘lgan.
Rasmiy statistikalar Tailandni Jahon sog‘liqni saqlash tashkiloti (WHO) a’zolari orasida yo‘l-transport hodisalari bo‘yicha eng xavfli davlatlar qatorida, 9-o‘rinda ekanini ko‘rsatadi.
Songkran festivali Tailand Yangi yili sifatida nishonlanadi va odatda millionlab odamlarning o‘z tug‘ilgan viloyatlariga safar qilishi bilan kechadi. Bayram “dunyodagi eng katta suv jangi” sifatida ham mashhur bo‘lib, ko‘chalarda ommaviy suv sepish an’anasi bilan o‘tkaziladi. Biroq ayni shu davrda yo‘llarda tirbandlik va xavfli harakatlar keskin ortadi.
Rasmiylar tomonidan “yetti xavfli kun” deb ataladigan ushbu davrda tezlikni oshirish, mast holda haydash va xavfsizlik qoidalariga rioya qilmaslik eng ko‘p uchraydigan omillar sifatida qayd etiladi.
Shu bilan birga, bayram davrida jamoat tartibini buzish holatlari ham qayd etilgan. Xususan, 12-aprel kuni yetti nafar fransiyalik sayyoh yo‘l harakatiga to‘sqinlik qilgani va jamoat tartibini buzganlikda gumon qilinib qo‘lga olingan. Rasmiylar ularning Songkran paytidagi tartibsiz xatti-harakatlari bo‘yicha ma’muriy choralar ko‘rilganini bildirgan.
