Berlinda ilk bor O‘zbekiston–Germaniya kasbiy ta’lim forumi bo‘lib o‘tdi
Germaniyadagi ish beruvchilar bilan bir nechta hamkorlik shartnomalari imzolandi.
O‘zbekiston–Germaniya kasbiy ta’lim forumi Berlin shahrida joylashgan O‘zbekiston Respublikasi Elchixonasida tashkil etildi. Mazkur uchrashuvda Germaniyadagi ta’lim dasturlari, xalqaro baholash, til kurslari, malaka oshirish, o‘quvchilar almashinuv kabi masalalar bo‘yicha faoliyat yuritadigan turli tashkilotlarning vakillari ishtirok etdi.
Ushbu forum Deutsche Gesellschaft für Internationale Zusammenarbeit (GIZ) va“TexVET II” loyihalari va O‘zbekistonning Germaniyadagi elchixonasi, Migratsiya agentligi bilan hamkorlikda tashkil etildi. Tadbir davomida O‘zbekistonda kasbiy ta’lim tizimida amalga oshirilayotgan keng ko‘lamli islohotlar alohida e’tirof etildi.
Shuningdek, uchrashuvda Respublika hududlaridagi kasbiy ta’lim boshqarmalari rahbarlari hamda texnikum direktorlari Germaniyadagi ish beruvchilar bilan bir nechta hamkorlik shartnomalarini imzoladi.
Ushbu kelishuvlar kasbiy ta’lim tizimini xalqaro standartlar asosida rivojlantirish, mutaxassislar tayyorlash sifatini oshirish hamda O‘zbekiston texnikumlarida Germaniya mehnat bozorining talablariga mos kadrlar yetishtirishda muhim ahamiyat kasb etadi.
