Qozog‘istonda yashash ruxsatnomasi uchun qozoq tilini B1 darajada bilish talab qilinmoqda

Qozog‘istonda yashash uchun ruxsatnoma berish tartibi o‘zgartirilmoqda. Endilikda arizachilardan qozoq tilini kamida B1 darajada bilish talab etiladi.

 

DW xabariga ko‘ra, 13-apreldan boshlab mamlakatga ko‘chib kelgan ayrim xorijiy fuqarolar, jumladan Rossiya va Ukraina fuqarolari hamda xorijda yashab kelgan etnik qozoqlar yashash ruxsatnomasi uchun ariza topshirishda rad javoblarini ola boshlagan. 

 

Relokantlar orasida majburiy til testi joriy etilgani va ko‘pchilik undan o‘ta olmagani haqida xabarlar tarqalgan. Avval A1 daraja talab qilingan bo‘lsa, amalda talablar kuchaytirilgani aytilmoqda.

 

Rasmiy darajada bu o‘zgarishlar hali to‘liq e’lon qilinmagan. Olmaota migratsiya xizmati vaziyatga izoh bermagan, biroq hozirda Astanada tegishli maslahatlashuvlar olib borilayotganini bildirgan.

 

Manbalarga ko‘ra, migratsiya siyosatidagi yangiliklar doirasida yashash ruxsatnomasini berish vakolati Mehnat va aholini ijtimoiy himoya qilish vazirligiga o‘tkazilgan. 

 

Shuningdek, 13-fevraldan boshlab “raqamli baholash” tizimi joriy etilib, u orqali arizachilarning to‘lovga qobiliyati va ishonchliligi baholanmoqda. Ushbu tizim barcha xorijliklar uchun majburiy bo‘lib, birinchi bosqichda qozoq tilidan B1 darajasida test topshirish talab etiladi.

 

Bundan tashqari, nomzodlarning oila tarkibi, ta’lim darajasi, ish tajribasi, kasbiy ko‘nikmalari, sog‘lig‘i va Qozog‘istonda qarindoshlari bor-yo‘qligi ham o‘rganiladi. Avvalgidek, mamlakat iqtisodiyoti uchun muhim bo‘lgan mutaxassislarga ustuvorlik beriladi.

 

Yangi tartibga ko‘ra, arizalar faqat hukumat tomonidan belgilangan yettita ustuvor hududda qabul qilinadi. Ular qatoriga Aqmola viloyatining ayrim tumanlari, Abay, Sharqiy Qozog‘iston, Qostanay, Pavlodar, Shimoliy Qozog‘iston viloyatlari va Ulytau kiradi. Millionlik shaharlar — Olmaota, Astana va Chimkent — ushbu ro‘yxatga kiritilmagan va amalda yashash rusatnomasi oluvchilar uchun yopilmoqda.

 

Shuningdek, arizachilar mahalliy ijro organlarida suhbatdan o‘tishi lozim. Baholash tizimining barcha bosqichlaridan muvaffaqiyatli o‘tgan shaxslargina migratsiya xizmatiga hujjat topshirish huquqini beruvchi bildirishnoma oladi.

 

Mutaxassislarning ta’kidlashicha, yangi qoidalar barcha xorijiy fuqarolarga — Markaziy Osiyo davlatlari vakillari va Xitoy fuqarolariga ham birdek tatbiq etiladi. Yangi tartib tafsilotlari yaqin kunlarda rasmiy manbalarda e’lon qilinishi kutilmoqda.