Toshkentda 77 ta jarimasi bor Matiz xatlandi
Maʼlum bo‘lishicha, haydovchining jarimalari 40 mln so‘mga yetgan.
Majburiy ijro byurosining Toshkent shahar boshqarmasi ish yurituviga Toshkent shahar IIBB YHXB qarorlariga asosan qarzdor fuqaro F.A.ga nisbatan 77 ta ijro hujjatlari kelib tushdi. Unga ko‘ra, uning maʼmuriy jarimalar bo‘yicha qarzi qariyb 40 million so‘mga yetgan.
Oddiy bir holat: fuqaro o‘zining “Matiz” avtomashinasida yo‘lga chiqib, yo‘l harakatlari qoidalarini buzib kelib, “hech narsa bo‘lmaydi” degan beparvolik 17 oy davomida davom etgan.
Natijada esa 77 marta qoidabuzarlik qayd etilgan. Har bir jarima alohida-alohida katta emasdek tuyulishi mumkin, lekin ular yig‘ilib borib, oxirida qariyb 40 million so‘mlik qarzga aylangan.
Eng achinarlisi, qarzdor bu jarimalarni o‘z vaqtida to‘lash o‘rniga, masalani cho‘zib yurgan. Oqibatda uning avtomashinasi qidiruvga berildi. Qidiruv ishlari natijasida esa ushbu “Matiz” jarima maydonidan topildi.
Shundan so‘ng davlat ijrochisi tomonidan qonuniy choralar ko‘rilib, avtoulov xatlandi.
