Toshkentda bankdan qarzdor fuqaroning BMW mashinasi xatlandi
Ayni paytda u 1 mlrd 34 mln 600 ming so‘mga baholangan.
Majburiy ijro byurosining Toshkent shahar boshqarmasi Alohida muhim ijro ishlarni ijro etish shoʻbasi ish yurituviga fuqarolik ishlari bo‘yicha Yakkasaroy tumanlararo sudining 2026 yil 27 fevraldagi ijro varaqasiga asosan, qarzdor P.K.dan undiruvchi “Asakabank” AJ foydasiga jami 614 mln 833 ming so‘m undirish hamda undiruvni garovda bo‘lgan “BMW X3” rusumli avtotransport vositasiga qaratish to‘g‘risidagi ijro hujjati yuzasidan ijro ishi qo‘zg‘atilgan.
Qonun talablariga muvofiq, qarzdorga qarzni ixtiyoriy ravishda qoplash uchun muddat berilgan. Biroq belgilangan muddatda qarzdorlik bartaraf etilmagani sababli majburiy ijro harakatlari amalga oshirildi.
Garov mulki sifatida qayd etilgan “BMW X3” rusumli avtomashina aniqlanib, belgilangan tartibda xatlandi hamda 1 mlrd 34 mln 600 ming so‘mga baholandi.
Ayni paytda ushbu avtotransport vositasini “E-auksion” elektron savdolariga chiqarish choralari ko‘rilmoqda. Savdodan tushgan pul mablag‘lari undiruvchi bank foydasiga yo‘naltiriladi, ortiqcha qismi esa qarzdorning hisob raqamiga o‘tkazib beriladi.
