20–21-aprel kunlari Samarqandda transmilliy narkotahdidlarga qarshi global forum bo‘lib o‘tadi
Tadbir BMT Narkotiklar va jinoyatchilik bo‘yicha boshqarmasi hamkorligida tashkil etiladi.
2026-yil 20–21-aprel kunlari Samarqand shahrida BMT Narkotiklar va jinoyatchilik bo‘yicha boshqarmasi hamkorligida “Jamoat salomatligi va xavfsizligini ta’minlash maqsadida transmilliy narkotahdidlarga qarshi kurashish” mavzusida global forum bo‘lib o‘tadi.
Mazkur tadbirni tashkil etishdan asosiy maqsad narkotiklarning noqonuniy aylanishiga qarshi kurash samaradorligini oshirish, ilg‘or xalqaro tajribalarni o‘rganish va amaliyotga joriy etish, zamonaviy tahdidlarga qarshi kompleks yondashuvlarni ishlab chiqish hamda xalqaro hamkorlikni mustahkamlashdan iborat.
Tadbirda Birlashgan Millatlar Tashkiloti, Interpol, Yevropa Ittifoqi, Shanxay hamkorlik tashkiloti, Mustaqil Davlatlar Hamdo‘stligi, Jahon bojxona tashkiloti hamda boshqa 20 dan ortiq nufuzli xalqaro tuzilmalar vakillari ishtirok etishi kutilmoqda.
Shuningdek, 50 ga yaqin davlatdan huquqni muhofaza qiluvchi organlar rahbarlari, 500 nafarga yaqin xalqaro ekspert va soha mutaxassislari qatnashadi.
