Golden House ustidan o‘rganish boshlandi: Iste’molchilarga 1 milliard so‘mdan ortiq mablag‘ qaytarildi
2025-2026-yillarda Raqobat qo‘mitasiga mazkur qurilish kompaniyasi ustidan 70 dan ortiq shikoyat kelib tushgan.
“GOLDEN HOUSE PROPERTY GROUP” MCHJ faoliyati ustidan o‘rganish ishlari olib borildi hamda iste’molchilar foydasiga 1 milliard so‘mdan ortiq pul mablag‘lari qayta hisob-kitob qilindi. Bu haqda Raqobat qo‘mitasi xabar berdi.
Ma’lum qilinishicha, Raqobat qo‘mitasiga 2025 -2026-yillarda “GOLDEN HOUSE PROPERTY GROUP” MCHJning faoliyati yuzasidan jami 74 ta shikoyat kelib tushgan.
Qo‘mita aralashuvidan so‘ng, ushbu shikoyatlardan 54 tasi quruvchi hamda fuqaro o‘rtasida o‘zaro kelishuv bitimi imzolanishi yoki nizolarni sudgacha mediatsiya yo‘li bilan hal etilishi natijasida ijobiy hal etilib, iste’molchilar foydasiga 1 mlrd 128 mln 669 ming so‘m miqdorda pul mablag‘lari qayta hisoblab berilgan.
2025-yilda kompaniyadan norozi bo‘lgan 40 nafar fuqaro murojaat qilgan bo‘lib, ularning 35 tasi (87 foizi) ijobiy hal etilgan. Shundan 31 tasi quruvchi hamda fuqaro o‘rtasida kelishuv orqali bartaraf etilgan, yana 4 holatda fuqarolar foydasiga jami 1 128 669 635 so‘m miqdorda pul qaytarilgan.
Shunga qaramay, 2026-yilning 1-choragi davomida mazkur quruvchi korxona faoliyatidan norozi bo‘lib 34 nafar fuqarodan murojaatlar kelib tushgan. Bulardan 19 tasi (56 foizi) qanoatlantirilgan bo‘lsa, 5 ta holatda belgilangan tartibda ish qo‘zg‘atilib va 10 ta murojaat yuzasidan vakolatli tashkilotni xabardor etgan holda tekshiruv tayinlangan.
Raqobat qo‘mitasi ijtimoiy tarmoqlarda ham ayni qurilish kompaniyasi va umuman soha bo‘yicha shikoyatlar ortib borayotganini qayd etdi. Shu munosabat bilan barcha quruvchilarga iste’molchilar bilan shartnoma tuzishda aniq va real muddatlarni belgilash, shuningdek, qonunchilikda belgilangan huquqlarni cheklamaslik bo‘yicha ogohlantirish berildi.
Qo‘mita, shuningdek, O‘zbekiston Respublikasi Konstitutsiyasining 65-moddasiga muvofiq, davlat iste’molchilar huquqlari ustuvorligini ta’minlagan holda tadbirkorlik erkinligini kafolatlashini eslatdi.
Ma’lumotlarga ko‘ra, Raqobat qo‘mitasiga 2023-yil 19 mingta, 2024-yilda 28 mingdan ortiq murojaatlar kelib tushgan bo‘lsa, bu ko‘rsatkich 2025-yilga kelib qariyb 54 mingga yetgani kuzatilmoqda.
