Samarqand forumida narkotahdidlarga qarshi zamonaviy texnologiyalar namoyish etildi
Narkotrafik va transmilliy jinoyatchilikni kuzatish uchun yagona sun’iy intellekt platformasini yaratish tashabbusi ilgari surildi.
Bugun Samarqand shahrida butun jahon hamjamiyati uchun eng dolzarb mavzulardan biri — “Jamoat salomatligi va xavfsizligini ta’minlash maqsadida transmilliy narkotahdidlarga qarshi kurashish” mavzusidagi xalqaro forum o‘z ishini boshladi.
Tadbirda 50 dan ortiq davlat vakillari, 500 dan ziyod xalqaro ekspert va mutaxassislar, shuningdek BMT, Interpol, Yevropa Ittifoqi, MDH va SHHT kabi yetakchi xalqaro tashkilotlar delegatsiyalari ishtirok etmoqda.
Forum doirasida tashkil etilgan ko‘rgazma bilan ham tanishildi. Unda uyushgan narkojinoyatchilikka qarshi kurashishda qo‘llanilayotgan zamonaviy raqamli texnologiyalar, ilg‘or texnik vositalar hamda maxsus uskunalar namoyish etildi.
Shuningdek, O‘zbekiston tomonidan ishtirokchi davlatlar uchun narkotrafik, xavfli yuklar va transmilliy jinoyatchilikni real vaqt rejimida kuzatib borish imkonini beruvchi yagona sun’iy intellekt platformasini yaratish tashabbusi ilgari surildi.
