Yaponiyada 7,5 ballik zilzila sodir bo‘ldi

Yaponiya qirg‘oqlari yaqinida magnitudasi 7,5 gacha bo‘lgan kuchli zilzila yuz berdi. Bu haqda CNN xabar berdi.

 

 

Ma’lum qilinishicha, Yaponiya Meteorologiya agentligi Ivate prefekturasi hamda Xokkaydo va Aomori hududlarining ayrim qismlari uchun 3 metr balandlikdagi sunami xavfi haqida ogohlantirdi. Shimoli-sharqiy Yaponiyaning boshqa hududlari uchun esa taxminan 1 metrgacha bo‘lgan sunami ehtimoli qayd etildi.

 

AQShning sunami ogohlantirish tizimi Yaponiyaning Xonsyu orolining sharqiy qirg‘oqlari yaqinida sodir bo‘lgan zilzila magnitudasi 7,4 ga teng ekanini ma’lum qilgan. Sunami xavfi 08:52 UTC vaqtida e’lon qilingan. Keyinchalik Yaponiya milliy agentligi zilzila kuchini 7,5 ga qayta baholadi, biroq bu tafovut sabablari hozircha aniq emas.

 

Voqea joyida bo‘lgan CNN prodyuserining Tokiodan xabar berishicha, ular joylashgan bino qariyb yetti daqiqa davomida tebrangan.

 

Yaponiya bosh vaziri Sanae Takaichi zarar ko‘rgan hududlar aholisini darhol evakuatsiya qilishga chaqirdi va hukumat favqulodda vaziyatlar bo‘yicha tezkor shtab tuzganini ma’lum qildi.

 

“Sunami xavfi e’lon qilingan hududlardagi aholi darhol balandroq joylarga yoki maxsus evakuatsiya binolariga ko‘chishi kerak”, — dedi Takaichi. 

 

Uning ta’kidlashicha, hukumat zarar ko‘lamini baholash va favqulodda choralarni ko‘rish uchun “barcha imkoniyatlarni ishga solmoqda”. Hozircha jabrlanganlar va moddiy zarar hajmi aniqlashtirilmoqda, yaqin orada batafsil ma’lumotlar taqdim etiladi.

 

Shuningdek, Tokio va Sin-Aomori stansiyalari o‘rtasida qatnovchi tezyurar poyezd operatori elektr ta’minotidagi uzilish sabab harakat vaqtincha to‘xtatilganini ma’lum qilgan.