“Dolzarb 100 kunlik” dasturi: “O‘zbekneftgaz” ilk natijalarni e’lon qildi
Dasturi doirasida moliyaviy barqarorlik, modernizatsiya va inson kapitalini rivojlantirish bo‘yicha muhim natijalarga erishilgani ma’lum qilindi.
Ommaviy axborot vositalari hamda blogerlar ishtirokida “O‘zbekneftgaz” AJ tomonidan 2026-yilning birinchi choragi yakunlari va “Dolzarb 100 kunlik” dasturi doirasida erishilgan natijalarga bag‘ishlangan matbuot anjumani o‘tkazildi.
Unda Boshqaruv raisining moliya, transformatsiya va xususiylashtirish bo‘yicha birinchi o‘rinbosari Suhrob Hamroyev, qayta ishlash bo‘yicha o‘rinbosari Abrorjon Xudoyberganov hamda Bosh geolog Nodirbek Muhiddinov ishtirok etdi.
Ta’kidlanganidek, dastur doirasida moliyaviy barqarorlikni ta’minlash, xarajatlarni optimallashtirish va mablag‘larni ustuvor ishlab chiqarish yo‘nalishlariga yo‘naltirish bo‘yicha tizimli choralar ko‘rildi.
Natijada, joriy yilning dastlabki choragidayoq qisqartirilgan xarajatlar va iqtisodiy samaradorlik hajmi 2,5 trillion so‘mni tashkil etdi. Tovar-moddiy resurslar narxlarini pasaytirish, debitor qarzdorliklarni undirish hamda to‘g‘ridan-to‘g‘ri muzokaralar natijasida qo‘shimcha 1,8 trillion so‘m mablag‘ tejaldi.
Sohaga oid bo‘lmagan aktivlarni tasarrufdan chiqarish hisobiga saqlash xarajatlari 30 milliard so‘mga kamaytirildi. Qurilish va burg‘ilash loyihalarini optimallashtirish orqali esa 438 milliard so‘m tejaldi.
2026-yilda geologiya-qidiruv ishlari yangi bosqichga olib chiqildi. Respublika bo‘yicha jami 10 ming kvadrat kilometr maydonda 3D seysmik tadqiqotlar o‘tkazilishi rejalashtirilgan bo‘lib, bu o‘tgan yilga nisbatan 4 baravar ko‘pdir.
Yer qa’ridan samarali foydalanish maqsadida 42 ta investitsiya bloki bo‘yicha ruxsatnomalar olindi.
Joriy yilda “O‘zbekneftgaz” tarixidagi eng katta burg‘ilash hajmi rejalashtirilgan. Umumiy hisobda 102 ta quduq burg‘ilanishi ko‘zda tutilgan bo‘lib, shundan 57 tasi izlov-qidiruv, 45 tasi ishlatish quduqlaridir.
Yil boshidan buyon 16 ta quduqdan sanoat miqyosida gaz oqimi olindi, Qoraqalpog‘istonda esa 3 ta yangi kon topildi. Bundan tashqari, 29 ta quduq ta’mirlandi.
Hisobot davrida ishlab chiqarish ko‘rsatkichlari barcha asosiy yo‘nalishlarda rejadan yuqori bajarildi. Jumladan:
- tozalangan tabiiy gaz — 4,789 mlrd kub metr
- gaz kondensati — 141,3 ming tonna
- suyultirilgan gaz — 152,9 ming tonna
- oltingugurt — 48 ming tonna
- polietilen — 36,1 ming tonna
Shuningdek, “Uzbekistan GTL” zavodida sintetik neft mahsulotlari ishlab chiqarish hajmi o‘tgan yilga nisbatan 169 foizga oshdi.
Kompaniya investitsiya siyosatini yangicha yondashuv asosida qayta ko‘rib chiqmoqda. Xitoyning CNPC, BGP, XIBU, Shandong Molong va Hengyang Valin kompaniyalari bilan geologiya, burg‘ilash va texnik ta’minot bo‘yicha hamkorlik loyihalari muhokama qilindi.
“O‘zbekneftgaz” AJda xodimlarning ijtimoiy himoyasi, mehnat sharoitlarini yaxshilash va malakali kadrlar tayyorlash masalalariga alohida e’tibor qaratilayotgani qayd etildi.
Matbuot anjumani davomida jurnalist va blogerlarning savollariga batafsil javob berildi.
