O‘zbekistonda endilikda mobil raqamni boshqa shaxs nomiga onlayn o‘tkazish mumkin
Xizmat Yagona portal orqali taqdim qilinmoqda.
Endi mobil aloqa foydalanuvchilari my.gov.uz orqali o‘zlarining mobil raqamlarini boshqa shaxs nomiga onlayn rasmiylashtirishlari mumkin. Bu imkoniyat my.gov.uz portali va MyGov ilovasi orqali taqdim etilmoqda.
Yangi tartibga ko‘ra, mobil raqam egasini o‘zgartirish uchun avval talab etilganidek, aloqa operatori xizmat markazlariga shaxsan borish, navbat kutish va hujjatlarni imzolash zarur bo‘lmaydi.
Xizmatdan foydalanish uchun:
- My.gov.uz portali yoki MyGov ilovasiga kiriladi;
- "Mobil raqamni qayta rasmiylashtirish" xizmatini tanlanadi;
- Kerakli ma’lumotlarni to‘ldirib, ariza yuboriladi.
Mobil raqamni qayta rasmiylashtirish uchun ariza berish jarayonida mobil raqamini o‘tkazmoqchi bo‘lgan va qabul qiluvchi shaxslar MyID orqali arizani tasdiqlashlari talab etiladi.
Qayd etilishicha, mazkur xizmat barcha mobil aloqa operatorlarida bosqichma-bosqich joriy etilmoqda.
Mobil aloqa operatorlari o‘z narx siyosatidan kelib chiqib, xizmat tarifi asosida to‘lov shakllantiradi, ba’zi mobil operatorlar tomonidan xizmat yaqin qarindoshlar uchun bepul amalga oshirilmoqda.
