Jizzaxda alimentdan qarzdor ota mashinasidan ayrildi
Maʼlum bo‘lishicha, erkak farzandiga aliment to‘lamay, avtomashinasini yashirib kelgan.
MIBning Jizzax shahar bo‘limi ish yurituviga fuqarolik ishlari bo‘yicha sud qaroriga asosan qarzdordan bir nafar farzand taʼminoti uchun daromadining 1/4 qismi miqdorida aliment undirish belgilangan ijro hujjati kelib tushib, ijro ishi qo‘zg‘atilgan.
Aliment to‘lovlaridan qarzdorlik yuzaga kelgani sababli qarzdorga tegishli KIA Carnival rusumli avtomashina qidiruvga berilgan.
Shuningdek, o‘rganishlar davomida qarzdorning nafaqat aliment, balki soliq, mikromoliya tashkilotlari va boshqa organlar foydasiga jami 34 ta ijro hujjati bo‘yicha qarzdorligi mavjudligi aniqlangan.
Byuroning Jizzax viloyati boshqarmasi Qidiruv shoʻbasi hamda YHXB xodimlari bilan hamkorlikda o‘tkazilgan tezkor qidiruv tadbirlari natijasida mazkur avtomashina qarzdor tomonidan yashirib qo‘yilgan garajdan topilib, jarima maydonchasiga joylashtirildi.
Qarzdorliklar qoplanmasa, ushbu avtomashina elektron onlayn savdoga chiqariladi. Tushgan mablag‘dan, avvalo farzand taʼminoti, so‘ngra boshqa qarzdorliklar qoplanadi.
