Milliy kino san’ati saroyi atrofidagi reklama bannerlari olib tashlandi
Toshkent shahrida madaniy meros obyektlari holati yuzasidan keng qamrovli monitoring boshlandi.
Navoiy ko‘chasi, 15-uyda joylashgan Alisher Navoiy nomidagi Milliy san’at saroyi (Panorama) hududida ruxsatsiz o‘rnatilgan reklama bannerlari aniqlanib, ular shu kunning o‘zida olib tashlangan. Bu haqda Madaniy meros agentligi ma’lum qildi.
Qayd etilishicha, 21-aprel kuni Agentlik direktorining birinchi o‘rinbosari Elmurod Najimov boshchiligidagi ishchi guruh tomonidan poytaxtdagi 28 ta madaniy meros obyekti o‘rganib chiqilgan.
Monitoring natijalariga ko‘ra, ayrim obyektlarda tarixiy va me’moriy qiyofaga nisbatan e’tiborsizlik holatlari aniqlangan. Xususan, 3 ta obyekt fasad qismi tashqi omillar ta’sirida ifloslangan, 4 ta obyekt bo‘yicha esa belgilangan tartibga zid ravishda ruxsatsiz ta’mirlash ishlari olib borilgani, reklama bannerlari o‘rnatilgani va fasadga o‘zboshimchalik bilan o‘zgartirishlar kiritilgani ma’lum bo‘lgan.
Shayxontohur tumanidagi Navoiy ko‘chasi, 12-uy manzilida joylashgan Din ishlari bo‘yicha qo‘mita binosi yuzasidan alohida o‘rganish olib borilgan. Unda bino fasadining rang yechimi ko‘cha bo‘yicha shakllangan me’moriy konsepsiyaga mos kelmasligi aniqlangan.
Shuningdek, 8-aprel kuni berilgan muhofaza belgisi hanuz o‘rnatilmagani qayd etilgan. Mas’ullarga fasadni tarixiy qiyofani saqlagan holda qayta tiklash va me’yoriy talablarga moslashtirish bo‘yicha ko‘rsatmalar berilgan.
Bundan tashqari, Navoiy ko‘chasi, 28-uydagi Markaziy telegraf binosi hududida ruxsatsiz yer qazish ishlari olib borilgani aniqlanib, mazkur ishlar zudlik bilan to‘xtatilgan va hududni avvalgi holatiga qaytarish bo‘yicha topshiriqlar berilgan.
Shuningdek, Navoiy ko‘chasi, 30-uyda joylashgan OAV uchun kontent tayyorlash markazi binosida ruxsatsiz ta’mirlash ishlari olib borilayotgani aniqlanib, mazkur holat yuzasidan huquqiy choralar ko‘rish jarayoni boshlangan.
Navoiy ko‘chasi, 38-uydagi “O‘zkimyosanoat” binosida esa ruxsatsiz o‘rnatilgan konditsioner qurilmalari aniqlanib, ularni olib tashlash yoki me’yorlarga mos ravishda joylashtirish bo‘yicha topshiriqlar berilgan.
Agentlik ma’lum qilishicha, monitoring davomida aniqlangan barcha holatlarga qonunchilik asosida huquqiy baho beriladi. Madaniy meros obyektlariga zarar yetkazish yoki ularning tarixiy qiyofasini buzishga nisbatan qat’iy choralar ko‘rilishi ta’kidlangan.
Avvalroq, “Xalqlar do‘stligi” san’at saroyi atrofidagi ruxsatsiz o‘rnatilgan reklama bannerlari ham olib tashlangani haqida xabar berilgandi.
