Oila va xotin-qizlar qo‘mitasi hamda Jurnalistlar uyushmasi o‘rtasida hamkorlik memorandumi imzolandi

 

2026-yil 22-aprel kuni Toshkent shahrida O‘zbekiston Respublikasi Oila va xotin-qizlar qo‘mitasi hamda O‘zbekiston Jurnalistlar uyushmasi o‘rtasida hamkorlikni yanada rivojlantirishga qaratilgan memorandum imzolandi.

 

Mazkur hujjat Oila va xotin-qizlar qo‘mitasi raisi Zulayxo Mahkamova hamda O‘zbekiston Jurnalistlar uyushmasi raisi vazifasini bajaruvchi Shuhrat Oripov o‘rtasidagi uchrashuv yakunida rasmiylashtirildi.

 

Muloqot davomida oila institutini mustahkamlash, xotin-qizlarning huquq va qonuniy manfaatlarini himoya qilish, ularning jamiyatdagi faolligini oshirish, shuningdek, ayollar va bolalarga nisbatan zo‘ravonlikning oldini olish borasida amalga oshirilayotgan islohotlarni ommaviy axborot vositalari orqali keng yoritish masalalari muhokama qilindi.

 

Memorandumga muvofiq, O‘zbekiston Jurnalistlar uyushmasi o‘z a’zolarini jalb qilgan holda oila va xotin-qizlar sohasidagi davlat siyosati, mazkur yo‘nalishda olib borilayotgan islohotlar hamda ijtimoiy tashabbuslarni ommaviy axborot vositalarida keng targ‘ib etishda faol ishtirok etadi.

 

Tomonlar hamkorlik doirasida bir qator yo‘nalishlarda qo‘shma ishlarni amalga oshiradi. Jumladan, mamlakatimizda oila institutini mustahkamlash, xotin-qizlarning jamiyatdagi o‘rni va faolligini oshirishga qaratilgan tashabbuslarni xalqaro maydonda targ‘ib qilish, xorijiy auditoriyaga mo‘ljallangan jurnalistik materiallar tayyorlash, “Oltin qalam”, “Atirgul” kabi ko‘rik-tanlovlar orqali, shuningdek, ijodiy loyihalar va media tashabbuslarni yo‘lga qo‘yish eng yaxshi jurnalistik materiallarni aniqlash, ularni rag‘batlantirish rejalashtirilgan.

 

Shuningdek, jurnalistlar uchun mediaturlar, matbuot anjumanlari va brifinglarda ishtirok etish imkoniyatlarini kengaytirish, qo‘mita tizimi xodimlari hamda xotin-qizlar faollarining OAV bilan ishlash ko‘nikmalarini oshirish bo‘yicha seminar-treninglar o‘tkazish ham nazarda tutilgan.

 

Bundan tashqari, ijtimoiy tarmoqlarda faol jurnalist va blogerlarni rag‘batlantirish, qo‘mita axborot xizmatiga raqamli kommunikatsiyalar bo‘yicha metodik yordam ko‘rsatish, soha faxriylarini e’zozlashga qaratilgan tadbirlarni tashkil etish yuzasidan ham o‘zaro hamkorlik yo‘lga qo‘yiladi.

 

Mazkur memorandum oila va xotin-qizlar masalalarini keng jamoatchilikka yetkazish, jamiyatda sog‘lom muhitni mustahkamlash hamda media sohasida samarali hamkorlikni rivojlantirishga xizmat qilishi ta’kidlandi.