Oʻzbekiston aeroportlari uch oyda qariyb 4 million yoʻlovchiga xizmat koʻrsatdi

 

Uzbekistan Airports 2026-yilning yanvar–mart oylaridagi faoliyat yakunlarini e’lon qildi. Hisobot davrida mamlakat aeroportlarida yoʻlovchi tashish, reyslar soni hamda yuk aylanmasi boʻyicha barqaror oʻsish qayd etildi.

 

Joriy yilning dastlabki uch oyida respublika aeroportlari orqali jami 30 859 ta reys amalga oshirilgan. Bu koʻrsatkich oʻtgan yilning mos davriga nisbatan 10 foizga yuqori. Shundan 22 885 tasi xalqaro, 7 974 tasi ichki reyslar hissasiga toʻgʻri keladi.

 

Mazkur davrda umumiy yoʻlovchilar oqimi 3 million 987 ming 313 nafarni tashkil etdi. Ularning 3,32 million nafari xalqaro, 663,5 ming nafari esa ichki yoʻnalishlarda safar qilgan. Bu esa 2025-yilning birinchi choragiga nisbatan 19 foizlik oʻsishni anglatadi.

 

Mamlakatning eng yirik aviatsiya markazi sifatida Toshkent xalqaro aeroporti yetakchilikni saqlab qolmoqda. Ushbu aeroport orqali 2,56 million yoʻlovchi qatnovi amalga oshirilgan hamda qariyb 19 ming reysga xizmat koʻrsatilgan.

 

Mintaqaviy aeroportlar orasida yoʻlovchilar soni boʻyicha quyidagi ko‘rsatkichlar qayd etildi:

• Samarqand — 376,4 ming yoʻlovchi
• Urganch — 222 ming yoʻlovchi
• Namangan — 210,1 ming yoʻlovchi
• Fargʻona — 161,2 ming yoʻlovchi

 

Shuningdek, yuk tashish segmentida ham ijobiy oʻsish kuzatildi. Birinchi chorak davomida aeroportlar orqali 19 783 tonna yuk va pochta tashilgan bo‘lib, bu oʻtgan yilga nisbatan 14 foizga ko‘pdir.

 

Mazkur natijalar Oʻzbekiston aviatsiya tarmogʻining izchil rivojlanayotgani, xalqaro yoʻnalishlar tarmog'ining kengayayotgani va mamlakat ichidagi harakatlanishning bosqichma-bosqich oshib borayotganini tasdiqlaydi.