O‘zbekistonda alkogol mahsulotlari yana naqd pulda sotiladi

Yaqin kunlarda umumiy ovqatlanish korxonalarida alkogol mahsulotlarini naqd pul shaklida ham sotib olish imkoniyati qayta yo‘lga qo‘yilishi kutilmoqda. Bu haqda 21-aprel kuni O‘zbekiston Savdo-sanoat palatasida o‘tkazilgan ochiq muloqotda Soliq qo‘mitasi raisi Farrux Po‘latov ma’lum qildi.

 

Ochiq muloqot davomida tadbirkor alkogol mahsulotlarini sotishda xorijlik mijozlar bilan bog‘liq ayrim muammolar yuzaga kelayotganini bildirgan.

 

Shundan so‘ng, Soliq qo‘mitasi rahbari bu masala bo‘yicha ishlar olib borilayotganini, yaqin kunlarda muammo hal etilishini ta’kidlagan.

 

“Bu bizning aybimiz. Bu bo‘yicha ishlayapmiz, yaqin kunlarda yechim beramiz. Albatta, buni to‘g‘rilab beramiz”, — degan Farrux Po‘latov.

 

Uning qo‘shimcha qilishicha, tegishli tartibga o‘zgartirish va qo‘shimchalar kiritish bo‘yicha hujjat loyihasi ishlab chiqilgan bo‘lib, hozirda manfaatdor idoralar bilan kelishuv jarayoni davom etmoqda.

 

Shuningdek, uchrashuvda mamlakatga tashrif buyurayotgan turistlar uchun qulay sharoit yaratish maqsadida mehmonxonalarda turistlik yig‘imni naqd pul shaklida ham qabul qilish imkoniyati yo‘lga qo‘yilgani qayd etildi.

 

Ma’lumotlarga ko‘ra, ushbu masala Savdo-sanoat palatasi tomonidan soliq maslahatchilari, auditorlar va buxgalterlar ishtirokidagi ochiq muloqotda ham muhokama qilingan.

 

Prezident Shavkat Mirziyoyev tomonidan 2025-yil 10-dekabrda imzolangan “Naqd pulsiz hisob-kitoblarni ommalashtirish va yashirin iqtisodiyot ulushini qisqartirishga qaratilgan qo‘shimcha chora-tadbirlar to‘g‘risida”gi farmon 2026-yil 1-apreldan kuchga kirgan.

 

Unga ko‘ra, ayrim tovar va xizmatlar uchun to‘lovlar faqat bank kartalari yoki elektron to‘lov tizimlari orqali amalga oshirilishi belgilangan. Jumladan:

 

• davlat xizmatlari;

 

• elektr energiyasi, tabiiy gaz va ichimlik suvi to‘lovlari;

 

• alkogol va tamaki mahsulotlari;

 

• yoqilg‘i quyish shoxobchalari orqali neft-gaz mahsulotlari va elektr transportlarini zaryadlash xizmatlari;

 

• qiymati 25 mln so‘mdan yuqori bo‘lgan tovar va xizmatlar;

 

• ko‘chmas mulk hamda ayrim transport vositalarining oldi-sotdisi.