“Kimyoviy profilaktika tadbirlari amalga oshirilmoqda”
Sanepidqo‘mita bolalar orasida meningit kasalligi avj olgani haqidagi xabarlarga munosabat bildirdi.
2026-yilda O‘zbekistonda aholi orasida meningokokk infeksiyasi bilan bog‘liq holatlar ortgani munosabati bilan kasallik tarqalishining oldini olish bo‘yicha qo‘shimcha choralar ko‘rilmoqda. Bu haqda Sanepidqo‘mita axborot xizmati xabar berdi.
Ma’lum qilinishicha, bolalar orasida ushbu infeksiya keng tarqalishini oldini olish maqsadida 8024 doza vaksina xarid qilinib, bemorlar bilan muloqotda bo‘lgan 4862 nafar fuqarolar emlash bilan qamrab olindi. Vaksina bilan emlashga tibbiy moneligi bo‘lgan bemorlar bilan muloqotda fuqarolar shifokorlar nazoratida kimyoviy profilaktika tadbirlari amalga oshirilmoqda.
O‘zbekistonda 2026-yilning 1-choragida 174 ta meningokokk holati ro‘yxatga olingan bo‘lib shundan 168 nafari 14 yoshgacha bo‘lgan bolalarni tashkil qilmoqda. Kasallik dinamikasiga ko‘ra, aprel oyida mart oyiga nisbatan 14 foizga kamayganligi kuzatilmoqda.
Qayd etilishicha, meningit bu bosh va orqa miya pardalarining yallig‘lanishi bo‘lib, ko‘pincha bakteriya yoki viruslar sababli yuzaga keladi va tez rivojlanishi bilan xavfli hisoblandi.
Profilaktika chorasi sifatida aholiga o‘z vaqtida emlanish, shaxsiy gigiyena qoidalariga rioya qilish, kasallik alomatlari kuzatilganda darhol shifokorga murojaat qilish hamda jamoat joylarida ehtiyot choralarini ko‘rish tavsiya etilmoqda.
Shuningdek, “Haj” va “Umra” ziyoratiga borayotgan fuqarolarga safar oldidan meningokokk infeksiyasiga qarshi emlanish, safardan qaytgandan so‘ng esa ommaviy tadbirlarda ishtirok etishni vaqtincha cheklash tavsiya qilingan.
