O‘zbekistonda yong‘in xavfsizligi qoidalarini buzganlik uchun jazolar kuchaytirildi

O‘zbekistonda yong‘in xavfsizligi qoidalarini buzganlik uchun javobgarlik choralarini kuchaytirishga qaratilgan qonun qabul qilindi. Bu haqda Adliya vazirligi tegishli hujjatga tayanib ma’lum qildi.

 

Qonunga muvofiq, Ma’muriy javobgarlik to‘g‘risidagi kodeksga bir qator o‘zgartirish va qo‘shimchalar kiritildi. Unga ko‘ra, korxonalar, muassasalar, tashkilotlar, ommaviy joylar, ombor binolari, yotoqxonalar hamda turar joylarda yong‘in xavfsizligi qoidalarini buzish, shuningdek, tegishli obyektlarni loyihalash, qurish va rekonstruksiya qilishda qonunbuzarliklarga yo‘l qo‘ygan shaxslarga nisbatan jarimalar oshiriladi.

 

Yangi tartibga ko‘ra, jismoniy shaxslarga 1 dan 3 BHMgacha, mansabdor shaxslarga esa 3 dan 10 BHMgacha jarima qo‘llaniladi.

Amaldagi tartibda mansabdor shaxslar uchun jarima 3 dan 7 BHMgacha etib belgilangan.

 

Shuningdek, Davlat yong‘in nazorati bosh inspektori va uning o‘rinbosarlariga ma’muriy huquqbuzarlik ishlari bo‘yicha mansabdor shaxslarga 25 BHMgacha jarima qo‘llash vakolati berildi. Ilgari ushbu ko‘rsatkich 20 BHMni tashkil etgan.

 

Bundan tashqari, Favqulodda vaziyatlar vazirligiga yong‘in bilan bog‘liq favqulodda holatlarning oldini olish hamda aholi hayoti va sog‘lig‘iga bevosita tahdid tug‘diruvchi vaziyatlarda qonunchilikda belgilangan tartibda tadbirkorlik faoliyatini vaqtincha to‘xtatish huquqi berildi.

 

Mazkur qonun rasmiy e’lon qilingan kundan boshlab uch oy o‘tib kuchga kiradi.