Qashqadaryoda Media haftalikning uchinchi kuni bo‘lib o‘tdi
Tadbir davomida ishtirokchilar faqat tinglovchi sifatida emas, balki faol bahs-munozara ishtirokchisi sifatida qatnashdi.
Qashqadaryo viloyatida davom etayotgan Media haftalik tadbirining uchinchi kuni turli soha vakillarini bir maydonga jamladi. Unda axborot xizmatlari rahbarlari va xodimlari, blogerlar hamda yosh mobilograflar tajribali ekspertlar bilan ochiq muloqot va munozaralarda ishtirok etdi.
Tadbir davomida ishtirokchilar faqat tinglovchi sifatida emas, balki faol bahs-munozara ishtirokchisi sifatida qatnashdi. Turli yondashuvlar sinovdan o‘tkazilib, tajriba almashinuvi aniq misollar va amaliy keyslar orqali muhokama qilindi.
Seminar-treninglar jonli va faol ruhda o‘tib, ishtirokchilarning katta qiziqishiga sabab bo‘ldi.
Ta’kidlanishicha, dastlabki kunlarda qatnashgan televideniye va bosma OAV vakillari ham uchinchi kun mavzulariga qiziqish bildirib, tadbirda yana ishtirok etish istagini bildirgan.
Media haftalik 24-aprelga qadar davom etadi. Tadbir Qarshi davlat universitetida o‘tkazilmoqda.
