Samarqandda jismoniy tarbiya o‘qituvchisi o‘quvchilarni kaltakladi
U kechasi 4 nafar o‘quvchilarni uyidan olib chiqib ketgan.
Samarqand viloyati Nurobod tumanida maktab o‘qituvchisi bilan bog‘liq holat yuzasidan xizmat tekshiruvi va tergov harakatlari boshlandi. Bu haqda viloyat maktabgacha va maktab ta’limi boshqarmasi ma’lum qildi.
Qayd etilishicha, tumandagi 20-maktabning jismoniy tarbiya o‘qituvchisi voyaga yetmagan o‘quvchilarga nisbatan zo‘ravonlik ishlatgani haqidagi xabarlar yuzasidan holat atroflicha o‘rganilmoqda.
Dastlabki ma’lumotlarga ko‘ra, pedagog kechki vaqtda to‘rt nafar o‘quvchini yashash manzilidan olib chiqib, ularga nisbatan kuch ishlatgan. Mazkur holat yuzasidan barcha tafsilotlar aniqlanmoqda.
Viloyat boshqarmasi ta’lim muassasalarida har qanday bosim, psixologik yoki jismoniy zo‘ravonlik mutlaqo qabul qilinmasligini hamda bunday holatlar qat’iy qoralanishini ta’kidlagan.
Hozirda holat huquqni muhofaza qiluvchi organlar bilan hamkorlikda atroflicha o‘rganilmoqda. O‘rganish yakunlariga ko‘ra qo‘shimcha ma’lumot taqdim etilishi ma'lum qilindi.
