“Olimboyevlarga uyini qaytaramiz” — Sanjar Karimov advokati

 

JIB Mirzo Ulug‘bek tuman sudida Sanjar Karimovga oid jinoyat ishi bo‘yicha navbatdagi sud majlisi bo‘lib o‘tdi. Unda sudlanuvchi va uning advokatlari ishtirok etib, “Olimboyevlar ishi” doirasida muhokama markazida bo‘lgan uy masalasiga ham to‘xtalib o‘tilgan.

 

Kun.uz'ning ma’lumotlariga ko‘ra, sud jarayonida advokatlar tomonidan narkojinoyat ayblovi yuzasidan Sanjar Karimovning uy-joyi va ofisida o‘tkazilgan tezkor tadbirlar davomida ayrim protsessual jihatlardagi qonuniylik masalalari ko‘tarildi. Shundan so‘ng tezkor tadbirda ishtirok etgan ichki ishlar organlarining jinoyat qidiruv bo‘limi xodimlarining ko‘rsatmalari tinglangan.

 

Sudlanuvchi Sanjar Karimov sud jarayonida o‘ziga qo‘yilgan ayblovlar yuzasidan izoh berar ekan, otasida demensiya kasalligi bo‘lgani sababli ayrim dori vositalari shifokor tavsiyasi bilan qo‘llanilganini ma’lum qilgan. U, shuningdek, topilgan moddaga aloqadorlikni rad etib, ushbu modda otasiga tegishli bo‘lgan kiyimdan chiqqanini bildirgan hamda tergovga tibbiy hujjatlar taqdim etilganini qayd etgan.

 

Shuningdek, sudlanuvchi otasi vafotidan so‘ng qisqa muddat davomida ayrim moddalarni iste’mol qilganini tan olgan, biroq hech qanday oldi-sotdi holatlari bo‘lmaganini ta’kidlagan.

 

Sud majlisi yakunida Sanjar Karimov va uning himoyachilari “Olimboyevlar ishi” bo‘yicha muhokama markazidagi uy masalasini egalariga qaytarishini bildirgan.

 

Sud tomonidan 27-aprelga qadar tanaffus qilingan.