O‘zbekistonda kameralar orqali 190 dan ortiq qoidabuzarlik holati aniqlandi
Eng ko‘p guvohnomasiz boshqaruv holatlari Xorazm va Toshkentda qayd etilgan.
O‘zbekistonda avtomatlashtirilgan foto va videokuzatuv tizimlari orqali haydovchilik guvohnomasisiz transport vositasini boshqarish bilan bog‘liq 192 ta holat aniqlangan.
Yo‘l harakati xavfsizligi xizmati ma’lumotiga ko‘ra, eng ko‘p qoidabuzarliklar Xorazm viloyatida qayd etilgan bo‘lib, bu hududda 60 ta holat aniqlangan. Keyingi o‘rinlarda Toshkent shahri — 40 ta, Qashqadaryo viloyati esa 20 ta holat bilan qayd etilgan.
Shuningdek, Toshkent viloyatida 14 ta, Jizzaxda 13 ta, Farg‘onada 10 ta, Andijonda 9 ta, Namangan va Surxondaryoda 6 tadan, Qoraqalpog‘istonda 5 ta, Sirdaryo va Samarqand viloyatlarida 3 tadan holat aniqlangan.
Qayd etilishicha, 32 ta holat bo‘yicha transport boshqarish huquqidan mahrum etilgan shaxslarning rulga o‘tirgani uchun ma’muriy bayonnoma rasmiylashtirilib, 50 baravar bazaviy hisoblash miqdorida jarima qo‘llanilgan.
Yana 31 ta holatda tegishli moddaning boshqa qismi asosida bayonnoma tuzilib, 5 baravar bazaviy hisoblash miqdorida jarima tayinlangan.
Mas’ullar ogohlantirishicha, transport boshqarish huquqidan mahrum etilgan shaxs tomonidan qoidabuzarlik takror sodir etilsa, jinoiy javobgarlik qo‘llanilishi mumkin.
