Isroilning sobiq bosh vazirlari Netanyaxuga qarshi ittifoq tuzdi

Isroilning sobiq bosh vazirlari Naftali Bennett va Yair Lapid amaldagi bosh vazir Binyamin Netanyahuning hukumatiga qarshi kurashish maqsadida siyosiy ittifoq tuzdi. Ular bu qarorni joriy yil oxirida o‘tkazilishi kutilayotgan saylovlar arafasida e’lon qildi, deya xabar bermoqda Al Jazeera.

 

Ma’lum qilinishicha, tomonlar o‘z partiyalarini birlashtirib, “Birga” (Together) nomli yangi siyosiy blok tuzayotganini ma’lum qildi. Unga Bennett rahbarlik qiladi. Ittifoqdan asosiy maqsad — Netanyaxuga qarshi parokanda muxolifatni birlashtirish ekani ta’kidlandi.

 

Bennett va Lapid qo‘shma bayonotda ushbu qadamni “mamlakat manfaatlari yo‘lida muhim siyosiy qaror” deb atadi. Lapid esa Bennettni “o‘ng qanot siyosatchisi, ammo halol inson” sifatida ta’riflab, ular o‘rtasida o‘zaro ishonch mavjudligini qayd etdi.

 

Shuningdek, Bennett saylovda g‘alaba qozongan taqdirda, 2023-yil 7-oktabr kuni HAMAS tomonidan amalga oshirilgan hujum oldidan yuzaga kelgan kamchiliklarni o‘rganish bo‘yicha milliy tergov komissiyasi tuzilishini bildirdi. Amaldagi Netanyaxuning hukumati bunday tashabbusni rad etgan.

 

Ikkala siyosatchi ham Netanyaxuning xavfsizlik va tashqi siyosat borasidagi qarorlarini tanqid qilib kelmoqda. Xususan, Lapid Eron bilan erishilgan ikki haftalik sulhni “siyosiy falokat” deb baholagan.

 

Bennett va Lapid avval ham 2021-yilda ittifoq tuzib, Netanyaxuning 12 yillik hokimiyatiga yakun yasagan edi. Biroq ular tuzgan koalitsion hukumat 18 oy faoliyat yuritib, parchalanib ketgan.

 

So‘nggi so‘rovlar Netanyaxu va Bennetning shaxsiy reytinglari deyarli tenglashganini ko‘rsatmoqda. 23-aprel kuni e’lon qilingan N12 News so‘roviga ko‘ra, Bennett boshchiligidagi kuchlar parlamentdagi 120 o‘rindan 21 tasini qo‘lga kiritishi mumkin, Netanyahuning “Likud” partiyasi esa 25 o‘ringa ega bo‘lishi prognoz qilingan. Lapid partiyasi esa hozirgi 24 o‘rindan 7 tasigacha qisqarishi mumkin.