Jizzaxda MIB orqali kelinning sarpolari qaytarildi
Ijro harakatlari davomida 30 dan ortiq mol-mulk to‘liq qaytarilgan.
Byuroning G‘allaorol tuman bo‘limi tomonidan fuqarolik ishlari bo‘yicha sud qarorlari ijrosi taʼminlanib, kelinlik sarpolari va boshqa mol-mulklar bilan bog‘liq nizoga chek qo‘yildi.
Aniqlanishicha, sobiq turmush o‘rtoqlar o‘rtasidagi mulkiy kelishmovchiliklar natijasida ayollarga tegishli bo‘lgan kelinlik sarpolari va boshqa shaxsiy buyumlarni qaytarish masalasida nizo kelib chiqqan. Ayollar o‘z mulklarini olib ketishga uringanlarida qarshilikka duch kelib, o‘z huquqlarini himoya qilish maqsadida sudga murojaat qilishgan.
Sud qarorlariga muvofiq, qarzdorlardan undiruvchilar foydasiga jami 30 turdagi mol-mulkni qaytarish belgilangan.
Olib borilgan ijro harakatlari natijasida undiruvchilarga tegishli barcha mol-mulklar, jumladan kelinlik sarpolari ham to‘liq hajmda qaytarib berildi. Shu bilan mazkur ijro hujjatlari bo‘yicha ishlar to‘liq yakunlandi.
